पुणे गणेश विसर्जन २०२६: नागरिकांसाठी महत्त्वाची बातमी! मिरवणूक मार्गावर वाहने लावण्यासाठी शहरात २६ ठिकाणी विशेष पार्किंगची व्यवस्था, पाहा संपूर्ण यादी

पुणे: लाडक्या बाप्पाच्या अनंत चतुर्दशीच्या विसर्जन मिरवणुकीत सहभागी होण्यासाठी आणि मानाच्या गणपतींचे दर्शन घेण्यासाठी शहरात येणाऱ्या लाखो भाविकांची गैरसोय टाळावी, तसेच वाहतूक कोंडी होऊ नये म्हणून पुणे शहर वाहतूक शाखा आणि पुणे महानगरपालिकेच्या (PMC) वतीने जय्यत तयारी करण्यात आली आहे. विसर्जन मिरवणुकीदरम्यान नागरिकांना आपली वाहने सुरक्षितपणे उभी करता यावीत, यासाठी शहरात तब्बल २६ ठिकाणी अधिकृत पार्किंग व्यवस्था तयार करण्यात आली असून वाहनचालकांनी रस्त्यावर अस्ताव्यस्त गाड्या न पार्क करता या विहित केलेल्या ठिकाणीच गाड्या लावाव्यात, असे आवाहन वाहतूक विभागाकडून करण्यात आले आहे.

पुणे पोलिसांच्या वाहतूक शाखेने जाहीर केलेल्या यादीनुसार, चार आणि दोन चाकी वाहनांसाठी खालीलप्रमाणे विविध ठिकाणी पार्किंगची सोय करण्यात आली आहे:

• प्रमुख पार्किंग ठिकाणे: शिवाजी आखाडा पार्किंग परिसर, पत्र्या मारुती चौकाजवळ असलेले हमालवाडा, आरटीओ चौकातील (RTO Chowk) मैदान, स. प. महाविद्यालय (SP College) मैदान, निळम टॉकीज परिसर, बीएमसीसी कॉलेज (BMCC College) मैदान, आबासाहेब गरवारे कॉलेज, संजिवनी मेडिकल कॉलेज मैदान, फर्ग्युसन कॉलेज परिसर, बीएमसीसी रोडवरील जैन हॉस्टेल मैदान, रानडे पथ, टिळक रोडवरील न्यू इंग्लिश स्कूल आणि भिडे पूल ते गाडगीळ पुलादरम्यानचे नदीपात्रातील क्षेत्र.

• दुचाकी वाहनांसाठी विशेष जागा: रमणबाग न्यू इंग्लिश स्कूल, गोगटे प्रशाला, सारसबागेकडील पेशवे पार्क, सावरकर चौकातील हरजीवन हॉस्पिटल समोर, पाटील प्लेजा, तसेच पर्वती ते दंडेकर पूल, दंडेकर पूल ते गणेशमळा आणि गणेशमळा ते राजाराम पूल यादरम्यानचा परिसर, मराठवाडा कॉलेज, पेशवे पथ आदी ठिकाणी दुचाकी पार्किंगची सोय केली गेली आहे.

• चार चाकी वाहनांसाठी: पुरम चौकाजवळील पीएमपीएल (PMPML) मैदान हे चार चाकी वाहनांच्या पार्किंगसाठी निश्चित करण्यात आले आहे.

दरम्यान, यातील काही ठिकाणी (उदा. देसाई कॉलेज परिसर) केवळ पोलिसांच्या वाहनांसाठी पार्किंग राखीव ठेवण्यात आले असून नागरिकांनी रस्त्यांवर वाहने उभी करून वाहतुकीस अडथळा निर्माण करू नये, असे विशेष निर्देश पोलीस उपायुक्त (वाहतूक) डॉ. संदीप भाजीभाकरे यांनी दिले आहेत. नागरिकांनी सार्वजनिक वाहतूक व्यवस्थेचा अधिकाधिक वापर करावा आणि प्रशासनाला सहकार्य करावे, असे आवाहनही करण्यात आले आहे.