Pune : पुणे हादरले! दर्शना पवार हत्या प्रकरणाची पुनरावृत्ती टळली, पोलीस ठाण्यासमोरच MPSC विद्यार्थिनीवर कोयत्याने हल्ला

Pune : पुण्यामध्ये गुन्हेगारीच्या घटना वाढत चालल्या आहेत. गुन्हेगारांवर पोलिसांचा वचकच राहिला नसल्याचे चित्र वारंवार पुण्यात समोर येत आहेत. अशामध्ये नुकताच झालेल्या दर्शना पवार हत्या प्रकरणाची पुनरावृत्ती होता होता राहिली. पुण्यामध्ये एका तरुणीवर पोलीस ठाण्यासमोरच कोयत्याने जीवघेणा हल्ला झाल्याची धक्कादायक घटना समोर आली आहे. याप्रकरणी पोलिसांनी आरोपी तरुणाला ताब्यात घेतले आहे.

मिळालेल्या माहितीनुसार, एमपीएससीचे शिक्षण घेणाऱ्या तरुणीवर तिच्याच मित्राने कोयत्याने हल्ला केला आहे. या हल्ल्यात या तरुणीसोबत तिचा आणखी एक मित्र जखमी झाला आहे. तरुणीवर हल्ला करणारा तरुण आणि तिचा मित्र हे देखील एमपीएससीचे शिक्षण घेत आहेत.पुण्यातील सदाशिव पेठेत या तरुणीवर कोयत्याने हल्ला करण्यात आला आहे. सदाशिव पेठेतील पेरुगेट पोलीस चौकीजवळ ही घटना घडली.

Pune Crime : राजगडाच्या पायथ्याशी अढळला तरुणीचा मृतदेह; MPSC परीक्षेत राज्यात आली होती सहावी!

पीडित तरुणी कॉलेजला निघाली होती. तिच्यासोबत तिचा मित्र देखील होता. तिच्यावर कोयत्याने हल्ला करण्यात आला. यावेळी आरोपीने तिच्या मित्रावर देखील हल्ला केला. हल्ल्यानंतर ही तरुणी आपला जीव वाचवण्यासाठी रस्त्यावरुन पळू लागली. तिच्या मागे आरोपी कोयता घेऊन लागला होता तरी देखील कुणीच तिच्या मदतीला धावून आले नाही.

जखमी अवस्थेत तरुणीला धावताना पाहून एक तरुण तिच्या मदतीला धावून आला. कोयता हातात असलेला तरुण मुलीच्या डोक्यात वार करणार तेवढ्यात लेशपाल जवळगे नावाचा तरुणाने आरोपीच्या हातातील कोयता पकडला आणि त्याला रोखले. त्यानंतर इतर लोकं पुढे आले आणि हल्लेखोर तरुणाला त्यांनी चोप दिला. त्यानंतर पोलीसांनी हल्लेखोर तरुणाला ताब्यात घेतलं.

जुन्या प्रेम प्रकरणाचा राग मनात धरुन या तरुणाने तरुणीवर कोयता हल्ला केल्याची माहिती समोर येत आहे. या हल्ल्यात तरुणी आणि तिचा मित्र जखमी झाला असून त्यांच्यावर रुग्णालयात उपचार सुरु आहेत. पोलिसांनी हल्लेखोर तरुणाला ताब्यात घेतले असून त्याची चौकशी सुरु आहे. या प्रकरणाचा तपास पोलिसांकडून सुरु आहे.