Pune Birthday Celebration : पुण्यात टोळीचा धिंगाणा सुरुच, भरचौकात गाडी आडवी लावून तलवारीने कापला केक

Pune : पुण्याच्या सहकार नगरमध्ये टोळक्यांनी वाहनांची तोडफोड केल्याची घटना ताजी असतानाच आणखी एक धक्कादायक घटना समोर आली आहे. याच परिरात टोळीचा धिंगाणा सुरुच आहे. या टोळीला पोलिसांचा धाक राहिला नसल्याचे चित्र पाहायला मिळत आहे. सध्या सहकार नगर पोलीस ठाण्याच्या हद्दीतून एक व्हिडिओ समोर आला आहे. या व्हिडिओमध्ये भरचौकात एका टोळीने भाईचा बर्थडे सेलिब्रेट केला आहे. या भाईने भरचौकात गाडी आडवी लावून नंतर त्यावर केक ठेवून तलवारीने केक कापला आहे.

मिळालेल्या माहितीनुसार,सहकार नगर पोलीस ठाण्याच्या हद्दीतील एका रस्त्यावर या टोळीने बुधवारी रात्री उशिरा भाईचा बर्थडे सेलिब्रेट केला. गल्लीबोळामध्ये या अशाप्रकारे बर्थडे सेलिब्रेशनचे प्रमाण पुण्यामध्ये वाढत चालले आहे. या टोळीने भररस्त्यात गाडी आडवी लावली. त्यानंतर मोठी गर्दी करत नंतर गाडीवर केक ठेवून तलवारीने केक कापला.

त्यानंतर या टोळीने त्याठिकाणी धिंगाणा घालत आरडाओरडा केला. त्यामुळे नागरिकांना त्रास झाला. अशाप्रकारच्या टोळीकडून सतत होणारे राडे यामुळे नागरिकांमध्ये दहशतीचे वातावरण आहे. आधीच वाहनांच्या तोडफोडीची घटना त्यानंतर अशाप्रकारे बर्थडे सेलिब्रेशन करुन धिंगाणा घातल्याने या टोळीला पोलिसांचा धाक राहिला आहे की नाही असा प्रश्न उपस्थित केला जात आहे.

या घटनेचा व्हिडिओ सध्या सोशल मीडियावर व्हायरल होत आहे. सहकार नगर पोलिसांनी या घटनेची दखल घेतली आहे. याप्रकरणी पोलिसांनी धिंगाणा घालणाऱ्या सर्व तरुणांना ताब्यात घेतले आहे. त्यांच्याविरोधात गुन्हा दाखल करण्याचे काम पोलिसांकडून सुरु आहे. अशाप्रकराची घटना यापूर्वी देखील पुण्यामध्ये घडली आहे. पुण्यातील उत्तमनगर परिसरात 18 जून रोजी टोळीने अशाचप्रकारे वाढदिवस साजरा करुन धिंगाणा घातला होता.

उत्तमनगर परिसरात वाढदिवसाला टोळीकडून कोयते फिरवत तसेच दगडफेक केल्याची घटना घडली होती. याठिकाणी भर रस्त्यात टोळीकडून वाढदिवस साजरा करण्यात आला होता. यावेळी किरकोळ कारणावरुन त्यांच्यात वाद झाला. या वादानंतर टोळीने एकमेकांना शिवीगाळ करत गाड्यांची तोडफोड केली होती. कार, दुचाकीसह इतर वाहनांची तोडफोड करण्यात आली होती. यामुळे वाहनांचे मोठे नुकसान झाले होते. या घटनेमुळे उत्तमनगर परिसरातील नागरिकांमध्ये दहशत परसरली होती.