Pune Accident : पुण्यात भयानक अपघात, स्वच्छता महिला कर्मचाऱ्याला कारने फरफटत नेलं; घटनास्थळावर आक्रोश

Pune Accident : विद्येचं माहेरघर म्हणून ओळखल्या जाणाऱ्या पुणे शहरात सोमवारी पहाटेच्या सुमारास भीषण अपघात झाला आहे. स्वच्छता महिला कर्मचारी सासवड रस्ता पदपथालगत साफसफाई करीत असताना अचानक भरधाव वेगात कार आली. क्षणात या कारने महिला कर्मचाऱ्याला दूरपर्यंत फरफटत नेलं. या भयानक घटनेत महिलेचा जागीच मृत्यू झाला. 

छाया भजनदास शिंदे (वय ४५, रा. विशाल झोपडपट्टी, आकाशवाणी, हडपसर) असे अपघातात मृत्यू झालेल्या महिलेचे नाव आहे. सोमवारी (ता. ५) सकाळी पावणेआठ वाजेच्या सुमारास हा अपघात झाला. या घटनेनंतर घटनास्थळी मोठा आक्रोश पाहायला मिळाला.

मिळालेल्या माहितीनुसार, छाया शिंदे या पालिकेच्या सातववाडी आरोग्य कोठीकडे कंत्राटी स्वच्छता कर्मचारी म्हणून काम करीत होत्या. हडपसर-सासवड महामार्गावर सातववाडी जवळ त्या नेहमीप्रमाणे झाडलोट करीत होत्या.

त्यावेळी सासवडकडे जाणाऱ्या एका खासगी प्रवासी मोटारीने पदपथावरील वडाच्या झाडाला धडक देऊन पुढे स्वच्छतेचे काम करणाऱ्या छाया यांना फरपटत नेले. या भयानक घटनेत छाया यांचा जागीच मृत्यू झाला.

दरम्यान, अपघाताची माहिती मिळताच पोलिसांनी तातडीने घटनास्थळी धाव घेतली. पोलिसांनी छाया यांचा मृतदेह ताब्यात घेऊन शवविच्छेदनासाठी पाठवला आहे. याप्रकरणी पोलिसांनी कारचालकाविरोधात गुन्हा दाखल केला असून घटनेचा तपास सुरू केला आहे. या घटनेनं परिसरातून हळहळ व्यक्त होत आहे.