चंद्रपूर काँग्रेसमध्ये राजकीय वादळ; धानोरकर-वडेट्टीवार यांच्या दोन 'व्हीप'मुळे नगरसेवक संभ्रमात!

चंद्रपूर महानगरपालिकेतील काँग्रेसमधील अंतर्गत संघर्ष आता एका गंभीर वळणावर पोहोचला आहे. खासदार प्रतिभा धानोरकर आणि विरोधी पक्षनेते विजय वडेट्टीवार यांच्या समर्थकांमधील वादामुळे पक्षात दोन गट पडले असून, दोन्ही गटांनी आपापल्या पातळीवर स्वतंत्र 'व्हीप' (Whip) जारी केल्याने काँग्रेसचे नगरसेवक पुरते गोंधळले आहेत. या परिस्थितीमुळे नगरसेवकांमध्ये मोठी धास्ती आणि घबराटीचे वातावरण निर्माण झाले आहे.

 

 

नेमकं काय घडलं?
काँग्रेसमधील गटनेता बदलण्याच्या प्रक्रियेवरून हा वाद पेटला आहे. खासदार प्रतिभा धानोरकर समर्थक गटाने विद्यमान गटनेता बदलण्यासाठी १५ जून रोजी बैठक बोलावली होती. याला प्रत्युत्तर म्हणून वडेट्टीवार समर्थक विद्यमान गटनेते राजेश अडूर यांनी १४ जून रोजी तातडीची बैठक बोलावून पक्षाचा 'व्हीप' जारी केला होता. विशेष म्हणजे, अडूर यांच्या बैठकीला २७ पैकी केवळ ११ नगरसेवकच उपस्थित राहिले होते.

 

नगरसेवकांची कोंडी दोन्ही गटांकडून कायदेशीर कारवाई तसेच अपात्रतेचे इशारे देण्यात आल्यामुळे नगरसेवक 'इकडे आड, तिकडे विहीर' अशा परिस्थितीत सापडले आहेत.

राजेश अडूर गट: यांनी १५ जूनची बैठक बेकायदेशीर असल्याचे सांगत, त्या बैठकीला उपस्थित राहू नये किंवा कोणत्याही ठरावावर स्वाक्षरी करू नये, असे निर्देश दिले आहेत. तसेच, बैठकीला अनुपस्थित राहणाऱ्यांवर थेट अपात्रतेची कारवाई करण्याचा इशारा दिला आहे.

प्रतिभा धानोरकर गट: या गटाने १५ नगरसेवकांना यवतमाळमधील एका रिसॉर्टमध्ये हलवल्याची चर्चा आहे, ज्यामुळे राजकीय वातावरण अधिकच तापले आहे.

काही महिन्यांपूर्वी देखील गटनेता निवडीवरून असाच संघर्ष झाला होता, जो थेट दिल्लीपर्यंत पोहोचला होता. त्यावेळी वडेट्टीवार गटाला गटनेतेपद आणि धानोरकर गटाला महापौरपदाच्या उमेदवारीवर समाधान मानावे लागले होते. मात्र, अवघ्या चार महिन्यांतच हा वाद पुन्हा उफाळून आल्याने चंद्रपूरच्या राजकीय वर्तुळात खळबळ उडाली आहे.

 

सविस्तर वाचा, लिंक कमेंट मध्ये  https://punenews24.in/