नवी मुंबई: ड्युटी संपली, तरी माणुसकीचे कर्तव्य निभावले! वाहतूक पोलिसांच्या तत्परतेमुळे बेशुद्ध कारचालकाचे वाचले प्राण

नवी मुंबई: कर्तव्याची वेळ संपल्यानंतरही माणुसकीचे उत्तम उदाहरण पेश करत रबाळे वाहतूक शाखेच्या दोन पोलीस शिपायांनी प्रसंगावधान दाखवून एका बेशुद्ध कारचालकाचे प्राण वाचवल्याची हृदयस्पर्शी घटना नवी मुंबईत घडली आहे. त्यांच्या या धाडसी आणि तत्पर कृतीबद्दल सर्व स्तरातून त्यांचे कौतुक होत आहे.

नेमकी घटना काय?
१७ जुलै २०२६ रोजी रात्री सुमारे साडेदहा वाजण्याच्या सुमारास रबाळे वाहतूक शाखेचे पोलीस शिपाई सचिन ढाले आणि सचिन सुळ हे दोघे आपले नियमित कर्तव्य संपवून घरी जात होते. त्यावेळी रबाळे येथील रिलायन्स उड्डाणपुलाच्या बेलापूर लेनवर एक कार दुभाजकाला (डिव्हायडर) आदळल्याचे त्यांच्या निदर्शनास आले. पोलिसांनी तातडीने गाडीजवळ जाऊन पाहणी केली असता, कारचालक बेशुद्ध अवस्थेत असल्याचे त्यांना दिसले.

 

गांभीर्य लक्षात घेऊन दोन्ही पोलिसांनी क्षणचाही विलंब न लावता चालकाला तातडीने सीपीआर (CPR) दिला. काही क्षणांतच चालकाला शुद्ध आली. त्यानंतर त्यांनी कोणतीही वेळ न घालवता चालकाला रबाळे येथील गवळी हॉस्पिटलमध्ये उपचारासाठी दाखल केले.

चालकाची प्रकृती स्थिर
रुग्णालयात उपचार घेतल्यानंतर चालकाने आपले नाव सचिन बिचुकले असून ते सानपाडा येथील मोराज रेसिडेन्सीमध्ये राहणारे असल्याचे सांगितले. ते लार्सन अँड टुब्रो (L&T) कंपनीत नोकरीला असून ऑफिसवरून घरी जात असताना त्यांना हा त्रास झाला होता. उपचारादरम्यान त्यांच्या मोबाईलवर पत्नी अंजली बिचुकले यांचा फोन आला असता, पोलिसांनी त्यांना संपूर्ण घटना समजावून सांगितली आणि रुग्णालयात दाखल केल्याची माहिती दिली. दुसऱ्या दिवशी पोलिसांनी रुग्णालयात जाऊन विचारपूस केली असता त्यांची प्रकृती स्थिर असल्याचे समजले. "या पोलिसांनी योग्य वेळी मदत केली नसती, तर आज मी जिवंत नसतो," अशा शब्दांत सचिन बिचुकले यांनी पोलिसांबद्दल कृतज्ञता व्यक्त केली.