Nagarparishad Election : राज्यातील २६४ नगरपरिषद व नगरपंचायत निवडणुकांसाठी मतदान सुरू; कडेकोट पोलिस बंदोबस्त, प्रशासन पूर्ण अलर्टवर

Nagarparishad Election : राज्यातल्या २६४ नगरपरिषदा आणि नगरपंचायतींच्या अध्यक्षपदांच्या आणि ६ हजार ४२ सदस्यपदांच्या निवडणुकीसाठी आज मतदान पार पडत आहे. तर उद्या ३ डिसेंबरला मतमोजणी होणार आहे. या स्थानिक स्वराज्य संस्थांच्या निवडणुकीत सत्ताधारी आणि विरोधी पक्षांसह स्थानिक नेत्यांचीही प्रतिष्ठा पणाला लागली आहे. राज्यात तब्बल ८ वर्षांनतर या निवडणुका होत आहेत. त्यामुळे आज हजारो उमेदवारांचे भविष्य मतपेटीत बंद होणार आहे. दरम्यान निवडणुकीसाठी तगडा बंदोबस्त तैनात करण्यात आला असून यंत्रणाही अलर्टवर आहेत.

यावेळी मात्र राज्यात महायुती किंवा महाविकास आघाडी अशी निवडणूक न लढवता स्थानिक पातळीवर निर्णय घेऊन निवडणूक लढवली जात आहे. दरम्यान राज्यातील २४ नगरपरिषदांच्या आणि नगर पंचायतींच्या निवडणुका पुढे ढकलण्यात आल्या आहेत. यामध्ये बारामती, अनगर, अंबरनाथ, सारख्या लक्षवेधी नगरपरिषदांचा समावेश आहे.

Haveli Elections : हवेली तालुक्यात बदलती राजकीय समीकरणे; यात्रा, देवदर्शन, लक्ष्मीदर्शन की खरा विकास?

या निवडणुकीच्या प्रचाराच्या तोफा सोमवारी संध्याकाळी थंडावल्या. अखेरच्या दिवशी मुख्यमंत्री देवेंद्र फडणवीस, उपमुख्यमंत्री अजित पवार आणि एकनाथ शिंदे यांनी विविध भागांत सभा घेतल्या. काही ठिकाणी मंत्र्यांनी आणि प्रमुख नेत्यांनीही उमेदवारांच्या प्रचारार्थ दौरे केले. प्रचाराबरोबर नेत्यांनी जोरदार शक्तिप्रदर्शनाची संधी सोडली नाही.