देवभूमीत मुंबईकरांवर जीवघेणा हल्ला! मसूरीजवळ पोलिसांसमोरच पर्यटकांवर दगडफेक; दरीत ढकलण्याचाही प्रयत्न, व्हिडिओ व्हायरल

उत्तराखंडमध्ये मुंबईच्या पर्यटकांवर स्थानिक व्हेंडर्सकडून भीषण हल्ला; पोलिसांच्या समोरच दगडफेक आणि दरीत ढकलण्याचा प्रयत्न केल्याचा आरोप, व्हिडिओ व्हायरल उत्तराखंड या देवभूमीत पर्यटनासाठी गेलेल्या मुंबईतील एका पर्यटकासोबत आणि त्यांच्या वृद्ध वडिलांसोबत अत्यंत धक्कादायक आणि थरकाप
उडवणारी घटना घडली आहे.

मसूरी-कनाताल महामार्गावर स्थानिक व्यावसायिक आणि व्हेंडर्सनी मुंबईच्या पर्यटकांना घेरून त्यांच्यावर पोलिसांसमोरच जोरदार दगडफेक केली. एवढेच नव्हे तर वाद विकोपाला गेल्यानंतर पर्यटकांना थेट खोल दरीत ढकलून देण्याचाही जीवघेणा प्रयत्न केल्याचा गंभीर आरोप करण्यात आला आहे.
या संपूर्ण घटनेचा एक व्हिडिओ सध्या सोशल मीडियावर तुफान व्हायरल झाला असून इंटरनेटवर तीव्र संताप व्यक्त केला जात आहे.

पैशांच्या वादातून थेट दगडफेक:मिळालेल्या माहितीनुसार, मुंबईतील एक पर्यटक आपल्या ज्येष्ठ नागरिक असलेल्या वडिलांसह उत्तराखंडमधील प्रसिद्ध मसुरी–कनाताल महामार्गावरील सुरकांडा माता मंदिर परिसरात पर्यटनासाठी गेले होते. या परिसरात एका स्थानिक व्हेंडरकडून (असे सांगितले जात आहे की हा व्हेंडर कथितरित्या 'क्लब महिंद्रा कनाताल'शी संबंधित आहे) पर्यटकांकडून जबरदस्तीने अवाजवी पैसे उकळण्याचा प्रयत्न केला गेला. पर्यटकांनी या सक्तीच्या वसुलीला आणि गुंडगिरीला स्पष्ट विरोध केला. या विरोधानंतर स्थानिक व्यावसायिक आणि त्यांच्या इतर साथीदारांनी मिळून पर्यटकांना घेरले. वाद इतका वाढला की स्थानिक गुंडांनी पर्यटकांच्या दिशेने थेट मोठे दगड फेकण्यास सुरुवात केली. त्यांना बेदम मारहाण करत रस्त्याच्या कडेला असलेल्या खोल दरीत ढकलून देण्याचाही प्रयत्न केला गेला. पोलिसांच्या भूमिकेवर प्रश्नचिन्ह; मूकदर्शक बनून पाहिली मारहाण:व्हायरल झालेल्या व्हिडिओमध्ये सर्वात संतापजनक बाब समोर आली आहे ती म्हणजे स्थानिक पोलिसांची हतबलता किंवा निष्क्रीयता. व्हिडिओमध्ये स्पष्ट दिसत आहे की, ज्या पर्यटकावर दगडाने हल्ला झाला तो रक्तबंबाळ किंवा घाबरलेल्या अवस्थेत पोलिसांकडे हात जोडून मदतीची याचना करत आहे. "सर, बघा हे लोक माझ्यावर दगड फेकत आहेत," असे तो पोलिसांना सांगत आहे.

दगड फेकणारे आणि हुज्जत घालणारे स्थानिक गुंड थेट पोलिसांच्या समोरच उभे राहून पुन्हा धमकावत आहेत, तरी देखील उपस्थित पोलिसांनी त्या गुंडांवर कोणतीही कडक ॲक्शन घेतली नाही किंवा त्यांना रोखण्याचा प्रयत्न केला नाही. पर्यटकांच्या सुरक्षेचा गंभीर प्रश्न:पोलिसांसमोरच घडलेल्या या गुंडगिरीमुळे
उत्तराखंडमधील स्थानिक प्रशासन आणि कायदा-सुव्यवस्थेच्या चिंधड्या उडाल्याचे पाहायला मिळत आहे. या घटनेमुळे उत्तराखंडमध्ये फिरण्यासाठी जाणाऱ्या देशभरातील पर्यटकांमध्ये भीतीचे वातावरण निर्माण झाले आहे.

"जर पोलिसांसमोरच पर्यटकांवर जीवघेणे हल्ले होणार असतील, तर सर्वसामान्य नागरिकांनी सुरक्षेसाठी कोणाकडे पाहायचे?" असा सवाल उपस्थित केला जात आहे. या घटनेचा व्हिडिओ व्हायरल झाल्यानंतर आता नेटकऱ्यांनी दोषींवर तात्काळ कठोर कारवाई करण्याची आणि पर्यटकांना सुरक्षा देण्याची मागणी उत्तराखंड
सरकारकडे लावून धरली आहे.