अहिल्यानगर: जिल्हा बँक निवडणुकीत खासदार नीलेश लंके विजयी, आमदार पराभूत

अहिल्यानगर: जिल्हा मध्यवर्ती सहकारी बँकेच्या निवडणुकीच्या निकालांनी जिल्ह्याच्या राजकारणात मोठी खळबळ उडवून दिली आहे. अहिल्यानगर जिल्हा सहकारी बँकेच्या २१ जागांसाठी ही निवडणूक प्रक्रिया पार पडली होती, ज्यामध्ये पालकमंत्री राधाकृष्ण विखे पाटील आणि माजी मंत्री बाळासाहेब थोरात यांच्या नेतृत्वाखालील पारंपरिक पॅनलविरुद्ध खासदार नीलेश लंके यांच्या नेतृत्वाखालील पॅनल अशी थेट लढत पाहायला मिळाली. या २१ पैकी ११ जागा यापूर्वीच बिनविरोध झाल्या होत्या, तर उर्वरित १० जागांसाठी सोमवारी विक्रमी मतदान झाले होते. अहिल्यानगर येथील कल्याण रोडवरील मतमोजणी केंद्रावर आज सकाळी मतमोजणी सुरू झाल्यानंतर जाहीर झालेल्या निकालांनी राजकीय वर्टुळाचे लक्ष वेधून घेतले.

पारनेर सेवा सोसायटी मतदारसंघात झालेली ही निवडणूक अत्यंत प्रतिष्ठेची आणि अटीतटीची मानली जात होती. या मतदारसंघात एकूण १०४ मतदार होते. या अत्यंत संवेदनशील आणि प्रतिष्ठेच्या लढतीत खासदार नीलेश लंके यांनी सुरुवातीपासूनच मतांची आघाडी घेत, विखे गटाचे समर्थक व प्रतिस्पर्धी उमेदवार राहुल शिंदे यांचा २३ मतांच्या फरकाने पराभव केला. खासदार नीलेश लंके यांनी दणदणीत विजय मिळवत जिल्हा बँकेच्या राजकारणात आपली धडाकेबाज एन्ट्री नोंदवली आहे. पारनेरच्या सहकार क्षेत्रात या विजयामुळे खासदार लंके यांनी आपले निर्विवाद वर्चस्व पुन्हा एकदा सिद्ध केले असून, हा निकाल विरोधी गटासाठी आणि विशेषतः विखे फळीसाठी एक मोठा राजकीय धक्का मानला जात आहे.

तसेच, पारनेरपाठोपाठ अत्यंत संवेदनशील ठरलेल्या अकोले सेवा सोसायटी मतदारसंघातही मोठा राजकीय उलटफेर पाहायला मिळाला. या ठिकाणी अकोल्याचे विद्यमान आमदार किरण लहामटे यांना अनपेक्षित आणि मोठा पराभवाचा धक्का सहन करावा लागला. अकोल्यात माजी अध्यक्ष सीताराम गायकर यांच्या कन्या ज्योती शिंदे यांनी विद्यमान आमदार किरण लहामटे यांचा पराभव करत ऐतिहासिक विजय मिळवला. जिल्हा बँकेच्या या निवडणुकीमुळे जिल्ह्यातील सहकार आणि राजकारणाची समीकरणे वेगाने बदलत असल्याचे स्पष्ट होत असून, या निकालांचे आगामी राजकीय पटलावर दूरगामी परिणाम होणार आहेत.