सोलापुरात 'एमडी' ड्रग्जचे जाळे; मुंबई-पुण्यातील कनेक्शन आणि व्हॉट्सॲप कॉलचा वापर, पोलिसांसमोर मोठे आव्हान

सोलापूर: सोलापूर शहर आणि जिल्ह्यात 'एमडी' (मेफेड्रोन) ड्रग्जचा विळखा घट्ट होत असल्याचे धक्कादायक वास्तव समोर आले आहे.
मुंबई आणि पुण्यातील मुख्य डीलर्स व्हॉट्सॲप कॉल्सच्या माध्यमातून स्थानिक एजंटांशी संपर्क साधून हे ड्रग्ज तरुण पिढीपर्यंत पोहोचवत आहेत. नुकत्याच झालेल्या एका पोलीस कारवाईमुळे या ड्रग्ज साखळीचे धागेदोरे उघड झाले आहेत.

कसे चालते हे रॅकेट? तपासात असे समोर आले आहे की, एमडी ड्रग्जचा मुख्य पुरवठा मुंबईतून होतो. मुंबईतील डीलर्स पुणे आणि सोलापूरमधील आपल्या खात्रीशीर एजंटांच्या संपर्कात असतात. पकडले जाऊ नये म्हणून हे एजंट सामान्य फोन कॉलऐवजी व्हॉट्सॲप कॉल्सचा वापर करतात.

सोलापूर शहरातील तसेच दक्षिण सोलापूरमधील बोरामणी, मुस्ती, तांदुळवाडी यांसारख्या ग्रामीण भागातील तरुणही या व्यसनाच्या आहारी गेल्याचे दिसत आहे. किंमत आणि सेवन:या एमडी ड्रग्जची किंमत प्रति ग्रॅम ३००० ते ५००० रुपयांच्या घरात आहे. हे ड्रग्ज तंबाखूतून किंवा पाण्यातून घेतले जाते. अत्यंत घातक असलेले हे रसायन एकदा-दोनदा घेतले तरी त्याचे तीव्र व्यसन जडते, ज्यातून बाहेर पडणे तरुणांना कठीण जात आहे.

पोलिसांची मोठी कारवाई:नुकतेच सोलापूर पोलिसांनी ४६ ग्रॅम एमडी ड्रग्जसह सुफियान फुलारी आणि तौफिक सय्यद या दोघांना अटक केली आहे.

तौफिक हा पोलिसांच्या रेकॉर्डवरील गुन्हेगार असून त्याच्यावर पुण्यातही गुन्हे दाखल आहेत. पोलीस पथक त्यांचा पाठलाग करत असताना त्यांची गाडी तामलवाडी टोल नाक्याजवळ बंद पडली आणि पोलिसांनी त्यांना झडप घालून पकडले.

तपास सुरू: सोलापूर शहर आणि ग्रामीण पोलीस आता या ड्रग्ज साखळीचा मूळ शोध घेण्यासाठी मुंबईला रवाना झाले आहेत. ड्रग्ज माफिया आपले मोबाईल नंबर आणि राहण्याचे पत्ते सतत बदलत असल्याने पोलिसांसमोर मोठे आव्हान उभे राहिले आहे.