नागपुर: सोन्या-चांदीत गुंतवणुकीचे भरघोस आमिष दाखवून कंत्राटदाराला ३६ लाखांनी गंडा

नागपूर: सोने आणि चांदीमधील गुंतवणुकीवर भरघोस परतावा देण्याचे तसेच शहरातील नामांकित बिल्डर्सशी व्यावसायिक ओळख करून देण्याचे प्रलोभन दाखवून, जरीपटका भागातील एका कंत्राटदाराला सायबर गुन्हेगारांनी तब्बल ३६ लाख रुपयांचा चुना लावल्याची संतापजनक घटना समोर आली आहे. याप्रकरणी नागपूर सायबर पोलिसांनी कथित पलाश सोनी आणि त्याचा साथीदार चिनू या दोन जणांविरुद्ध फसवणुकीचा गुन्हा दाखल केला असून, आरोपींचा कसून शोध घेतला जात आहे.

पोलिसांनी दिलेल्या सविस्तर माहितीनुसार, तक्रारदार शेख ताहिर हे जरीपटका परिसरात राहतात आणि ते बांधकाम साहित्याचा (कॉन्ट्रॅक्टर) पुरवठा करण्याचे काम करतात. गत ६ एप्रिल रोजी त्यांना एका अनोळखी क्रमांकावरून व्हॉट्सॲप कॉल आला होता. कॉल करणाऱ्या व्यक्तीने स्वतःचे नाव पलाश सोनी असल्याचे सांगितले. आरोपीने तक्रारदाराचा विश्वास संपादन करण्यासाठी शहरातील मोठ्या आणि नामांकित बिल्डर्सशी त्यांची ओळख करून देण्याचे आणि त्या माध्यमातून व्यवसाय वाढवून देण्याचे आकर्षक आश्वासन दिले. यानंतर वेळोवेळी झालेल्या संवादात आरोपीने शेअर मार्केटमधील सोने व चांदी गुंतवणूक विभागात पैसे गुंतविल्यास मोठा नफा मिळेल, असे सांगून त्यांना गुंतवणुकीसाठी उद्युक्त केले.

आरोपींच्या थापांना आणि गोड बोलण्याला भुलून तक्रारदाराने 'प्रीमियर ट्रेडिंग कंपनी'च्या बँक खात्यात पैसे जमा करण्यास सुरुवात केली. आरोपींच्या आश्वासनांवर संपूर्ण विश्वास ठेवून तक्रारदाराने दोन वेगवेगळ्या आरटीजीएस (RTGS) व्यवहारांद्वारे एकूण ३६ लाख रुपये संबंधित आरोपींनी सांगितलेल्या बँक खात्यात जमा केले. मात्र, ही मोठी रक्कम जमा झाल्यानंतरही गुंतवणुकीवर कोणताही परतावा (नफा) मिळाला नाही आणि मूळ रक्कमही परत करण्यात आली नाही. जेव्हा तक्रारदाराने वारंवार संपर्क साधण्याचा प्रयत्न केला, तेव्हा आरोपींकडून टाळाटाळ करण्यात आली आणि कोणतीही समाधानकारक माहिती मिळाली नाही. आपली फसवणूक झाल्याचे लक्षात आल्यानंतर अखेर तक्रारदाराने नागपूर सायबर पोलिसांकडे धाव घेत रीतसर तक्रार दाखल केली.

या प्रकरqणी सायबर पोलिसांनी कथित पलाश सोनी आणि त्याचा साथीदार चिनू यांच्याविरुद्ध भारतीय न्याय संहिता (बीएनएस) कलम ३१८(४), ३१९(२), ३३६(३) तसेच माहिती तंत्रज्ञान अधिनियमाच्या (IT Act) कलम ६६(डी) अंतर्गत गुन्हा नोंदविला आहे. पोलिस आता या संपूर्ण प्रकरणातील आरोपींचा शोध घेत असून, फसवणुकीची रक्कम आरोपींकडून नेमक्या कोणत्या बँक खात्यांमध्ये वळविण्यात आली आणि या रॅकेटमध्ये आणखी कोणाकोणाचा सहभाग आहे, याबाबतचा सखोल तपास सायबर पोलिसांकडून केला जात आहे.