पुणे: संसाराचा गाडा हाकतानाच आता रिक्षाचे स्टेअरिंगही हाती! शीतल मोळवडेंच्या जिद्दीला सलाम, महिलांसाठी ठरल्या प्रेरणास्थान

पुणे: पिंपळे गुरव संसाराचा गाडा चालविण्यासाठी चार भिंतींत राहून जबाबदाऱ्या पार पाडण्यापेक्षा स्वकष्टातून हातभार लावला पाहिजे, असा निर्धार करून पिंपळे गुरवच्या शीतल राजेश मोळावडे यांनी रिक्षाचे स्टिअरिंग हाती घेतले. वाहन चालविण्याची आवड, काहीतरी वेगळे करण्याची जिद्द आणि मेहनतीच्या बळावर त्यांनी हे धाडस केले. समाज काय म्हणेल, लोक काय विचार करतील, याची पर्वा न करता त्या आत्मविश्वासाने रस्त्यावर उतरल्या.

पिंपळे गुरव येथील तुळजाभवानी नगरातील शीतल केवळ रिक्षाचालक नाहीत, तर कष्ट, प्रामाणिकपणा आणि आत्मनिर्भरतेच्या बळावर वेगळी ओळख निर्माण करणाऱ्या कणखर महिला आहेत. नातेवाइकांकडून मिळालेली प्रेरणा आणि स्वतःला असलेली वाहन चालविण्याची आवड, तसेच संसाराला हातभार लावावा आणि स्वतःच्या पायावर उभे राहावे, ही इच्छा त्यांना स्वस्थ बसू देत नव्हती. त्यांचे पती राजेश खासगी कंपनीत काम करतात. त्यांनी पत्नीच्या निर्णयाला पाठिंबा दिला. रिक्षा चालविण्याच्या कामाला विरोध केला नाही. त्यांच्या साथीमुळे शीतल यांना पुढे जाण्याचे बळ मिळाले. दोन वर्षांपूर्वी त्यांनी रिक्षा खरेदी केली. आवश्यक वाहनचालक परवाना मिळवला आणि वाहन चालविण्याचे प्रशिक्षण घेतले.

सकाळी घरातील कामे आटोपून त्या रिक्षा घेऊन घराबाहेर पडतात. मिळेल ते भाडे स्वीकारून प्रामाणिकपणे कष्ट करणे, हाच त्यांच्या दिनक्रमाचा भाग झाला आहे.
कामाची लाज न बाळगता कष्ट करण्याची तयारी
शीतल मूळच्या सातारा जिल्ह्यातील पाटण तालुक्यातील चोपडी गावच्या. कोणतेही काम छोटे नाही, याची शिकवण वडिलांकडून मिळाली. त्यामुळे समाजात वावरताना कामाची लाज न बाळगता कष्ट करण्याची तयारी, परिस्थितीशी दोन हात करण्याची हिंमत आणि स्वतःच्या निर्णयावर ठाम राहण्याची वृत्ती, या गुणांच्या बळावर त्यांनी वेगळी वाट तयार केली.

"लोक काय म्हणतील, यापेक्षा माझ्या कुटुंबासाठी मी काय करू शकते, याचा विचार केला. माझ्यासाठी ही केवळ रिक्षा नाही, तर स्वाभिमानाची आणि स्वावलंबनाची वाट आहे. मेहनत करून संसाराला हातभार लावता येतो, यापेक्षा मोठे समाधान नाही.

शीतल मोळावडे, रिक्षाचालक

पिंपळे गुरव