रत्नागिरी: कोंबड्यांच्या खोलीत रात्रभर राहिला बिबट्या; सर्व कोंबड्या फस्त करत दरवाजा उघडणाऱ्या महिलेवर केला हल्ला!

रत्नागिरी: रात्रीच्या वेळी कोंबड्यांच्या खोलीत शिरलेल्या बिबट्याने रात्रभरात सर्व कोंबड्या फस्त केल्या आणि दुसऱ्या दिवशी दुपारी ज्यावेळी घरातील महिलेने त्या खोलीचा दरवाजा उघडला, बिबट्या दाराबाहेर झेपावला. त्यात त्याचा पंजा आणि नख लागून महिला जखमी झाली. ही घटना बुधवार, १४ रोजी संगमेश्वर तालुक्यातील कोंड्ये सुवरेवाडी येथे घडली. बिबट्याचे नख मीना धोंडू सुवरे यांच्या चेहऱ्याला लागल्याने त्या जखमी झाल्या आहेत. या धक्कादायक घटनेमुळे संपूर्ण परिसरात भीतीचे सावट पसरले आहे.

कोंड्ये येथील सुवरे यांच्या घराशेजारीच कोंबड्यांसाठी एक भक्कम चिरेबंदी खोली बांधण्यात आली आहे. संध्याकाळी अंधार पडल्यानंतर कोंबड्या स्वतःहून या खोलीत जातात आणि त्यानंतर घरातील मंडळी दरवाजा बंद करतात. मंगळवार, १३ रोजी संध्याकाळी हा दरवाजा बंद होण्यापूर्वीच एक बिबट्या या खोलीत शिरला असावा, असा अंदाज आहे. बिबट्या आत असल्याचे लक्षात न आल्याने घरातील सदस्यांनी नेहमीप्रमाणे बाहेरून दरवाजा लावून घेतला. बिबट्या रात्रभर त्या खोलीतच बंदिस्त राहिला. रात्रभराच्या मुक्कामात बिबट्याने खोलीतील सर्व कोंबड्या फस्त केल्या.

बुधवारी दुपारी मीना सुवरे यांनी नेहमीप्रमाणे कोंबड्यांना बाहेर सोडण्यासाठी खोलीचा दरवाजा उघडला. दरवाजा उघडताच कोंबड्यांऐवजी रात्रभर बंदिस्त असलेला बिबट्या दबा धरून उभा होता. बिबट्याने बाहेरच्या दिशेने मोठी झेप घेतली. यात बिबट्याचा पंजा आणि नख मीना यांच्या चेहऱ्याला घासून गेल्याने त्या जखमी झाल्या. ग्रामस्थांनी मीना सुवरे यांना तत्काळ नजीकच्या फुणगूस प्राथमिक आरोग्य केंद्र, फुणगूस येथे दाखल केले.