रत्नागिरीत: डोंगराला तडे, घरांमध्ये भेगा; दरड कोसळण्याच्या भीतीने ६ कुटुंबांचे तातडीने स्थलांतर

रत्नागिरी: दापोली तालुक्यातील आसूद गावात दरड कोसळण्याच्या धोक्यामुळे नागरिकांमध्ये भीतीचे वातावरण निर्माण झाले आहे. मुसळधार पावसामुळे डोंगराला मोठे तडे गेले असून, काही घरांच्या भिंतींनाही भेगा पडल्या आहेत. संभाव्य धोका लक्षात घेऊन प्रशासनाने सहा कुटुंबांचे तातडीने सुरक्षितस्थळी स्थलांतर केले आहे.

मिळालेल्या माहितीनुसार, गेल्या काही दिवसांपासून सुरू असलेल्या जोरदार पावसामुळे डोंगराचा काही भाग खचण्यास सुरुवात झाली. यामुळे परिसरातील रहिवाशांनी घरांच्या भिंतींवर भेगा पडल्याचे निदर्शनास आणून दिले. त्यानंतर महसूल विभाग, ग्रामपंचायत आणि आपत्ती व्यवस्थापन पथकाने घटनास्थळी पाहणी करून परिस्थितीचा आढावा घेतला.

प्राथमिक तपासणीनंतर परिसर धोकादायक असल्याचे लक्षात आल्यानंतर प्रशासनाने खबरदारीचा उपाय म्हणून सहा कुटुंबांना सुरक्षित ठिकाणी हलवले. तसेच परिसरावर सतत लक्ष ठेवण्यात येत असून, आणखी दरड कोसळण्याचा धोका निर्माण झाल्यास अतिरिक्त स्थलांतराची तयारीही प्रशासनाने ठेवली आहे.

दरम्यान, भूगर्भ तज्ज्ञांकडून या भागाची पाहणी केली जाणार असून, डोंगराला पडलेल्या तड्यांचे कारण आणि पुढील संभाव्य धोके याचा अभ्यास केला जाणार आहे. नागरिकांनी अफवांवर विश्वास न ठेवता प्रशासनाच्या सूचनांचे पालन करावे, असे आवाहन करण्यात आले आहे.