पुणे: अंगावर पेट्रोल ओतून जिवंत मारण्याच्या गंभीर प्रकरणातील आरोपीला उच्च न्यायालयाकडून मोठा दिलासा; जामीन मंजूर

पुणे: सुपा पोलिस ठाण्यात दाखल असलेल्या खून प्रकरणात आरोपी संतोष चोपडे याला मुंबई उच्च न्यायालयाने ५० हजार रुपयांच्या जातमुचलक्यावर अटी-शर्तीसह जामीन मंजूर केला.आरोपीतर्फे ज्येष्ठ विधिज्ञ वकील  गिरीश कुलकर्णी व वकील  नीलेश वाघमोडे यांनी उच्च न्यायालयात अर्ज दाखल केला. मयत सागर जगताप याने संतोष चोपडे याच्याकडून घेतलेल्या कर्जाच्या वसुलीसाठी आरोपी घटनास्थळी गेले होते. त्यानंतर झालेल्या वादातून मृतास मारहाण करण्यात आली.

मात्र, दोषारोपपत्र व मृत्यूपूर्व जबाबात चोपडे याने मृतावर कोणताही प्रत्यक्ष हल्ला केला, पेट्रोल ओतले किंवा आग लावली, असा कोणताही विशिष्ट आरोप नाही. आरोपीची भूमिका केवळ घटनास्थळी उपस्थित असल्याचीच नमूद करण्यात आली आहे. बचाव पक्षाने न्यायालयाच्या निदर्शनास आणून दिले की, मृतावर पेट्रोल ओतून आग लावल्याचा थेट आरोप असलेल्या इतर आरोपींना यापूर्वीच उच्च न्यायालयाने जामीन मंजूर केला आहे. त्यामुळे समानतेच्या तत्त्वानुसार अर्जदारालाही जामीन देण्याची मागणी करण्यात आली.

सरकारी वकिलाने अर्जदाराकडे गुन्ह्याचा हेतू असल्याचा युक्तिवाद केला. मात्र, न्यायालयाने उपलब्ध दोषारोपपत्र, मृत्यूपूर्व जबाब आणि इतर कागदपत्रांचा अभ्यास करून अर्जदाराविरुद्ध कोणतेही स्वतंत्र किंवा प्रत्यक्ष कृत्य दिसून येत नसल्याचे नमूद केले. तसेच, आधी जामीन मिळालेल्या सहआरोपींपेक्षा अर्जदार आरोपीची भूमिका वेगळी असल्याचे दर्शविणारा कोणताही ठोस पुरावा नसल्याचे न्यायालयाने स्पष्ट केले. दोन्ही पक्षांचा युक्तिवाद ऐकून न्यायालयाने आरोपीला सशर्त जामीन मंजूर केला.