गडचिरोली: सती नदीत बुडून तीन शाळकरी विद्यार्थ्यांचा मृत्यू, कुरखेडा तालुक्यातील खेडेगावावर शोककळा

गडचिरोली: कुरखेडा तालुक्यातून एक अत्यंत हृदयद्रावक आणि मन सुन्न करणारी घटना समोर आली आहे. कुरखेडा तालुक्यातील राणी खेडेगाव येथे सती नदीत बुडून तीन चिमुकल्या शाळकरी विद्यार्थ्यांचा दुर्दैवी मृत्यू झाला आहे. या अत्यंत दुःखद घटनेमुळे संपूर्ण गावासह परिसरावर आणि जिल्ह्यावर शोककळा पसरली आहे.

प्राप्त माहितीनुसार, शनिवारी दुपारी धान रोवणीच्या कामासाठी पालकांसह घरातील सर्वजण शेतात गेले होते. आई-वडील शेतात कामात व्यस्त असताना, जिल्हा परिषद प्राथमिक शाळेतील चार विद्यार्थी दुपारी साडेबारा वाजताच्या सुमारास गावाजवळ वाहणाऱ्या सती नदीवर आंघोळीसाठी गेले होते.

नदीवर पोहोचल्यानंतर हे सर्व मुले आनंदाने नदीत उतरली, परंतु त्यांना नदीतील पाण्याची खोली आणि तीव्र पाण्याचा प्रवाह याचा अजिबात अंदाज आला नाही. पाण्याचा अंदाज न आल्याने आणि खोली जास्त असल्यामुळे या चार विद्यार्थ्यांपैकी तिघे जण खोल पाण्यात बुडाले. या अचानक घडलेल्या प्रकारामुळे त्यांच्यासोबत असलेल्या चौथ्या विद्यार्थ्याने कमालीचे प्रसंगावधान राखले. त्याने घाबरून न जाता तातडीने नदीतून बाहेर येत गावात धाव घेतली आणि घडलेल्या प्रकारची माहिती ग्रामस्थांना दिली.

मुले नदीत बुडाल्याची बातमी वाऱ्यासारखी गावात पसरताच ग्रामस्थांनी आणि स्थानिक मच्छिमारांनी तातडीने सती नदीच्या दिशेने धाव घेतली. गावकऱ्यांनी नदीत उतरून तात्काळ शोधमोहीम राबवली आणि तिन्ही विद्यार्थ्यांना बाहेर काढले. मात्र, तोपर्यंत उशीर झाला होता. या घटनेची माहिती मिळताच तहसीलदार, पोलीस पथक आणि आपत्ती निवारण विभागाचे कर्मचारी तात्काळ घटनास्थळी दाखल झाले. पोलिसांनी तिन्ही विद्यार्थ्यांचे मृतदेह ताब्यात घेऊन त्यांचा पंचनामा केला.

या दुर्घटनेत मृत पावलेल्या मुलांमध्ये लक्ष्मण सुन्हेर दुधकंवर (वय ६), कुणाल रमेश दुधकंवर (वय ५) आणि मोहित हिवराज सराटे (वय ११) अशी या दुर्दैवी बालकांची नावे आहेत. एकाच गावातील तीन चिमुळत्या मुलांचा नदीत बुडून मृत्यू झाल्यामुळे खेडेगाव येथील प्रत्येक नागरिकाचे डोळे पाणावले असून, संपूर्ण गावात वस्तीवर मोठा शोकसागर लोटला आहे. ऐन सणासुदीच्या किंवा कामाच्या दिवशी घडलेल्या या दुर्दैवी प्रकारामुळे परिसरात हळहळ व्यक्त होत आहे.