Income Tax Raids on Famous Sandeep Hotel and Group;

अहिल्यानगर: आणि पुणे परिसरात अत्यंत लोकप्रिय असलेल्या 'संदीप उद्योग समूहा'वर आयकर (Income Tax) विभागाने मोठा छापा टाकला आहे. बुधवारी (दि. १४) सकाळी ८ वाजेच्या सुमारास पुणे येथील आयकर विभागाच्या विशेष पथकाने एकाच वेळी विविध ठिकाणी धाडी टाकत तपासणी मोहीम सुरू केली. ही झाडाझडती आणि चौकशी सलग १२ तासांहून अधिक काळ म्हणजेच रात्री उशिरापर्यंत सुरू होती.

संदीप उद्योग समूहाची अहिल्यानगरमधील पुणे रस्त्यावर 'हॉटेल सचिन', 'हॉटेल उदयनराजे' आणि 'संदीप प्राईड' अशी तीन नामांकित आणि लोकप्रिय हॉटेल्स आहेत. याव्यतिरिक्त पुण्यातही या समूहाची हॉटेल्स कार्यरत आहेत. हे सर्व प्रकल्प त्यांच्या उत्कृष्ट खाद्यपदार्थांसाठी आणि खवय्यांच्या गर्दीसाठी संपूर्ण परिसरात प्रसिद्ध आहेत.

निवासस्थानासह व्यवस्थापक आणि बांधकाम व्यावसायिकावरही कारवाई

आयकर विभागाच्या पुणे पथकाने अतिशय नियोजनबद्ध पद्धतीने ही कारवाई पार पाडली. पथकातील एका तुकडीने सकाळीच संचालक कोतकर यांच्या केडगाव येथील निवासस्थानी धडक देत तपासणी सुरू केली. केवळ हॉटेल्सच नव्हे, तर हॉटेलच्या व्यवस्थापकाचे घर तसेच या समूहाशी संबंधित केडगाव येथील एका नामवंत बांधकाम व्यावसायिकाच्या घरावरही पथकाने छापे टाकले. एकाच वेळी अनेक ठिकाणी धाडी टाकल्यामुळे संबंधित व्यावसायिक वर्तुळात मोठी खळबळ उडाली आहे.

कागदपत्रे आणि डिजिटल डेटाची कसून तपासणी

सकाळी आठ वाजल्यापासून तिन्ही हॉटेल्स, कार्यालये आणि संबंधित व्यक्तींच्या घरांवर विविध पथकांकडून कागदपत्रे, आर्थिक व्यवहार, खात्यांच्या नोंदी आणि डिजिटल डेटाची कसून तपासणी करण्यात आली. आयकर अधिकारी प्रत्येक व्यवहाराची कसून छाननी करत असून बेहिशोबी मालमत्तेचा शोध घेतला जात आहे.

हेलिकॉप्टर खरेदीमुळे आला होता चर्चेत

संदीप उद्योग समूहाची हॉटेल्स त्यांच्या जेवणासाठी अत्यंत प्रसिद्ध असून अहिल्यानगर तसेच पुण्यात जेवणासाठी खवय्यांचे तासंतास वेटिंग असते. दरम्यान, गेल्या वर्षी कोतकर कुटुंबीयांनी ७ सीटर हेलिकॉप्टर खरेदी केले होते, ज्यामुळे हा उद्योग समूह संपूर्ण महाराष्ट्रात चर्चेत आला होता. मात्र, या अचानक झालेल्या आयकर विभागाच्या कारवाईमागील नेमके कारण किंवा किती रुपयांची करचोरी अथवा बेहिशोबी मालमत्ता समोर आली आहे, याबाबत अद्याप आयकर विभागाकडून कोणतीही अधिकृत माहिती देण्यात आलेली नाही.