सोलापूरच्या उसाच्या शेतात आढळला तब्बल १ कोटींहून अधिकचा गांजा; उसतोड कामगारांनी बिया टाकल्याचा अजब दावा करत शेतकऱ्याने झटकले हात

सोलापूर: सोलापूर जिल्ह्यातील अक्कलकोट तालुक्यातून एक खळबजनक बातमी समोर आली आहे. अक्कलकोट तालुक्यातील आळगे गावातील एका शेतकऱ्याच्या उसाच्या शेतात तब्बल एक कोटी पाच लाखांहून अधिक किमतीचा गांजा जप्त करण्यात आला आहे. या प्रकरणी पोलिसांनी धडक कारवाई करत संबंधित शेतकरी आणि त्याच्या मुलांवर गुन्हे दाखल केले आहेत. अक्कलकोट दक्षिण पोलिस ठाण्याचे पोलिस निरीक्षक विनोद घुगे यांच्या नेतृत्वाखालील पथकाने ही मोठी कारवाई केली आहे.

पोलिस अधीक्षक अतुल कुलकर्णी यांनी घेतलेल्या पत्रकार परिषदेत या संपूर्ण प्रकरणाची सविस्तर माहिती दिली. पोलिसांनी दिलेल्या माहितीनुसार, शेतकरी मलप्पा गुरबाळप्पा गड्डी ऊर्फ बिराजदार आणि त्यांची मुले सिद्धाराम बिराजदार (वय ३९) व श्रीकांत बिराजदार (वय ३०, सर्व रा. शेगाव, ता. अक्कलकोट) अशी गुन्हा दाखल करण्यात आलेल्या व अटक केलेल्या संशयितांची नावे आहेत. गुप्त माहितीच्या आधारे पोलिसांनी जेव्हा आळगे गावातील या उसाच्या शेतात छापा टाकला, तेव्हा तेथील दृश्य पाहून पोलिसांनाही आश्चर्याचा धक्का बसला. उसाच्या पिकाच्या आड मोठ्या प्रमाणावर गांजाची बेकायदेशीर लागवड केल्याचे उघडकीस आले.

पोलिसांनी शेतातून लाखो-कोटी रुपयांचा गांजा जप्त केल्यानंतर चौकशी सुरू केली. मात्र, या धक्कादायक प्रकारावर शेतकऱ्याने अत्यंत अजब आणि हैराण करणारा दावा केला आहे. शेतात गांजा कसा उगवला, यावर प्रतिक्रिया देताना शेतकरी म्हणाला की, आमच्या शेतात काम करण्यासाठी काही उसतोड कामगार आले होते. त्यांनी शेतात गांजा ओढला असावा आणि त्यानंतर ओढताना गांजाच्या बिया नकळतपणे शेतात खाली पडल्या, ज्यातून हे पीक आपोआप वाढले असावे, असा दावा आरोपी शेतकऱ्याने केला आहे. परंतु, पोलिसांचा प्राथमिक संशय आणि पुरावे पाहता ही केवळ दुर्लक्ष किंवा योगायोग नसून पद्धतशीरपणे गांजाची बेकायदेशीर लागवड केल्याचा दाट संशय आहे. या प्रकरणी पोलिस अधिक कसून चौकशी करत असून या रॅकेटमध्ये आणखी कोणाचा सहभाग आहे का, याचा शोध घेतला जात आहे.