"मी मोठ्या धर्मसंकटात!" शिंदे गटात जाण्याच्या चर्चांवर खासदार ओमराजे निंबाळकरांनी अखेर सोडलं मौन

मुंबई: ठाकरे गटाचे खासदार ओमराजे निंबाळकर मागील काही दिवसांपासून 'नॉट रिचेबल' असल्यामुळे राजकीय वर्तुळात उलट-सुलट चर्चांना उधाण आले आहे. ओमराजे निंबाळकर यांच्यासहित ६ खासदारांनी बंडखोरी केल्याच्या वृत्ताने महाराष्ट्रातील राजकीय वातावरण पूर्णपणे ढवळून निघालं आहे. या पार्श्वभूमीवर, सोशल मीडियावरही ओमराजे निंबाळकर यांना मोठ्या प्रमाणावर ट्रोलिंगचा सामना करावा लागत आहे. येत्या काही दिवसांत खासदार ओमराजे निंबाळकर हे मुख्यमंत्री एकनाथ शिंदे यांच्या नेतृत्वाखालील शिवसेनेत (शिंदे गट) प्रवेश करणार असल्याची जोरदार चर्चा सुरू असतानाच, आता खुद्द ओमराजे निंबाळकर यांनी यावर अत्यंत महत्त्वाचं भाष्य करत आपली भूमिका स्पष्ट केली आहे.

 

 

एका वृत्तपत्राला दिलेल्या मुलाखतीत ते म्हणाले, "मी सध्या मोठ्या धर्म संकटात आहे. इमोशनली (भावनिकदृष्ट्या) विचार केला तर हे पाऊल चुकीचे वाटते, पण पॉलिटिकल (राजकीय) दृष्टिकोनातून विचार केला तर हेच बरोबर आहे."

राजकीय अस्तित्व धोक्यात असल्याचा उद्वेग

ठाकरे गटात राहिल्यास राजकीय अस्तित्व धोक्यात येऊ शकते, अशी भीती व्यक्त करताना निंबाळकर म्हणाले, "खासदार असूनही जर स्थानिक स्वराज्य संस्थांच्या निवडणुकांमध्ये स्वतःची माणसं निवडून आणता येत नसतील, तर भविष्यात आपले राजकीय अस्तित्व धोक्यात येऊ शकते. मतदारसंघामध्ये रस्ते, पूल, डीपी यांसारखी महत्त्वाची कामे करण्यासाठी वारंवार प्रस्ताव देऊनही ती कामे होत नाहीत. सत्ता आणि निधी नसल्यामुळे सर्वसामान्यांची कामे करता येत नाहीत."

शिंदे सेनेत प्रवेश कधी?

एकनाथ शिंदे यांच्या शिवसेनेत प्रवेश करण्याबाबत विचारले असता ते म्हणाले, "शिंदे सेनेत प्रवेश करण्यासाठी माझ्यावर कार्यकर्त्यांचा आणि समर्थकांचा प्रचंड दबाव आहे. मात्र, माझे वडील पवनराजे निंबाळकर हत्याकांडाचा अंतिम निकाल २० जून रोजी लागणार आहे. या निकालानंतर मी मतदारसंघातील माझ्या सर्व कार्यकर्त्यांशी आणि लोकांशी सविस्तर चर्चा करूनच आपला अंतिम निर्णय जाहीर करेन."

पैशांचे आरोप पूर्णपणे खोटे

बंडखोरीसाठी किंवा पक्षांतरासाठी ५० कोटी किंवा १५ कोटी घेतल्याचा होत असलेल्या सर्व चर्चांचा त्यांनी तीव्र शब्दांत इन्कार केला. "पक्षांतरासाठी पैसे घेतल्याच्या चर्चा आणि आरोप पूर्णपणे खोटे व अवाजवी आहेत. हा निर्णय मी पैशांसाठी घेतलेला नाही, तर केवळ माझ्या मतदारसंघाच्या विकासासाठी आणि जनतेच्या हितासाठी घेतला आहे," असे त्यांनी स्पष्ट केले.

ठाकरे यांच्या नेतृत्वावर अप्रत्यक्ष नाराजी

मुलाखतीदरम्यान ओमराजे यांनी ठाकरे गटाच्या नेतृत्वावर अप्रत्यक्षपणे आपली नाराजी व्यक्त केली. ते म्हणाले, "मुख्यमंत्री एकनाथ शिंदे आणि उपमुख्यमंत्री देवेंद्र फडणवीस हे सतत लोकांमध्ये, कार्यकर्त्यांमध्ये फिरतात आणि अफाट मेहनत घेतात. उद्धव ठाकरे यांना आरोग्याच्या कारणांमुळे सतत फिरणे शक्य नसले, तरी आदित्य ठाकरे यांनी अधिक सक्रिय राहायला हवे होते आणि मैदानात उतरून काम करायला हवे होते."

 

सविस्तर वाचा, लिंक कमेंट मध्ये https://punenews24.in/