नाशिक: सप्तशृंगी गडाच्या पायथ्याशी भीषण अपघात भरधाव कारने पोलीस व भाविकांना उडवले, वाहतूक उपनिरीक्षक जागीच ठार तर अनेकजण जखमी!

नाशिक: जिल्ह्यातील प्रसिद्ध श्री सप्तशृंगी गडाच्या पायथ्याशी असलेल्या नांदुरी गावात नवरात्रोत्सवानिमित्त बंदोबस्तासाठी तैनात असलेल्या पोलीस कर्मचाऱ्यांसह भाविकांना एका भरधाव कारने जोरदार उडविल्याची अतिशय दुर्दैवी व भीषण घटना घडली आहे. या अपघातात नाशिक ग्रामीण पोलीस दलातील वाहतूक शाखेचे पोलीस उपनिरीक्षक (PSI) यांचा उपचारादरम्यान मृत्यू झाला असून, अन्य पोलीस कर्मचारी व अनेक भाविक गंभीर जखमी झाले आहेत. या दुर्घटनेमुळे संपूर्ण परिसरात आणि पोलीस दलात मोठी शोककळा पसरली आहे.

प्राप्त माहितीनुसार, सध्या नवरात्रोत्सवानिमित्त सप्तशृंगी गडावर देवीच्या दर्शनासाठी राज्यभरातून लाखो भाविकांची प्रचंड गर्दी होत आहे. कायदा व सुव्यवस्था तसेच वाहतूक सुरळीत राखण्यासाठी नांदुरी गावात ठिकठिकाणी पोलीस बंदोबस्त तैनात करण्यात आला असून बॅरिकेडिंगही करण्यात आले होते. रविवारी मध्यरात्रीनंतर दीड ते दोन वाजण्याच्या सुमारास नाशिकहून कळवणच्या दिशेने जाणारी एक भरधाव कार (क्रमांक MH 12 ML 7747) नांदुरी गावातील अभोणा टी-पॉइंटजवळ आली. या भरधाव कारने सर्वप्रथम एका दुचाकीस्वाराला जोरदार धडक दिली. त्यानंतर नियंत्रण सुटलेली ही कार पुढे जाऊन नाशिकच्या दिशेने येणाऱ्या दुसऱ्या एका वाहनाला समोरून धडकली.

एवढेच नव्हे तर, रस्त्याच्या मधोमध वाहतूक नियंत्रणासाठी लावलेल्या पोलीस बॅरिकेड्सना चिरडत या कारने थेट बंदोबस्तावर तैनात असलेल्या पोलीस अधिकारी, कर्मचारी आणि तेथे उपस्थित भाविकांना जोरदार धडक दिली. या भीषण धडकेत वाहतूक शाखेचे पोलीस उपनिरीक्षक विजय गायकवाड यांच्या हनुवटीला, दोन्ही पायांना व छातीला गंभीर दुखापत झाली. त्यांना तातडीने उपचारासाठी रुग्णालयात दाखल करण्यात आले, मात्र उपचारादरम्यान त्यांचा मृत्यू झाला. या अपघातात एपीआय दिनकर मुंडे यांच्या पायाच्या पंजाला दुखापत झाली असून हेड कॉन्स्टेबल सचिन राऊत यांच्यासह मुंबईहून दर्शन घेण्यासाठी आलेले महापे, मोरेश्वर बाळू पाटील, तेजस्वी पाटील, गोपाळ सोनवणे यांसह इतर ७ ते ८ भाविक व पोलीस कर्मचारी गंभीर जखमी झाले आहेत.

सर्व जखमींना तातडीने वणी ग्रामीण रुग्णालयात दाखल करण्यात आले, तर काहींना पुढील उपचारासाठी नाशिक जिल्हा रुग्णालयात हलविण्यात आले. अपघातानंतर परिसरात एकच तारांबळ व गोंधळ उडाला. पोलिसांनी याप्रकरणी तातडीने कारवाई करत कारचालकाला ताब्यात घेतले असून, चालक मद्यधुंद होता की अन्य काही कारणांमुळे त्याचे नियंत्रण सुटले, याचा सखोल तपास वणी व कळवण पोलीस करीत आहेत. नवरात्रीच्या पवित्र काळात ड्युटीवर असलेल्या पोलिसाचा अशा प्रकारे मृत्यू झाल्याने सर्वत्र हळहळ व्यक्त होत आहे.