चंद्रपुरात काळजाचा थरकाप! कुलरमध्ये पाणी भरताना वडिलांना वाचवायला गेला अन् मुलाचाही गेला जीव.

 

चंद्रपूर:  शहरात सध्या उष्णतेची तीव्र लाट सुरू आहे, त्यामुळे थंडावा मिळवण्यासाठी नागरिक मोठ्या प्रमाणात कुलरचा वापर करत आहेत. गुरुवारी सकाळी १० च्या सुमारास इंदिरानगर रेल्वे मार्गाजवळ ही हृदयद्रावक घटना घडली.

वामन मांडवे हे त्यांच्या घरातील कुलरमध्ये पाणी भरत असताना त्यांना अचानक विजेचा जोरदार धक्का बसला आणि ते खाली कोसळले. वडिलांना खाली पडलेले पाहून, त्यांना वाचवण्यासाठी धावलेला त्यांचा मुलगा राहुल मांडवे यालाही विजेचा तीव्र धक्का बसला. या दुर्दैवी घटनेत दोघांचाही जागीच मृत्यू झाला. घटनेची माहिती मिळताच परिसरातील नागरिक घटनास्थळी धावले आणि दोघांना तातडीने रुग्णालयात नेण्याचा प्रयत्न केला, परंतु वैद्यकीय अधिकाऱ्यांनी त्यांना मृत घोषित केले.

या घटनेमुळे संपूर्ण इंदिरानगर परिसरात शोककळा पसरली आहे. महावितरणने याआधीही उन्हाळ्यात विद्युत उपकरणांच्या वापराबाबत सावधगिरीच्या सूचना दिल्या होत्या. कुलर किंवा इतर उपकरणांचे वायरिंग तपासून घेणे आणि पाणी भरताना मुख्य स्विच बंद ठेवणे किती गरजेचे आहे, हे या घटनेतून पुन्हा एकदा अधोरेखित झाले आहे.