मध्य प्रदेश: हाय-व्होल्टेज ड्रामा: प्रियकरासोबत लग्नासाठी तरुणी थेट मोबाईल टॉवरवर!

मध्य प्रदेशातील राजगड जिल्ह्यातील सुथलिया गावातून एक अजब आणि धक्कादायक घटना समोर आली आहे. गुरुवारी सायंकाळी एका २२ वर्षीय तरुणीने बॉयफ्रेंडसोबत लग्नाचा हट्ट धरत थेट मोबाईल टॉवर गाठला. टॉवरच्या वर चढून तिने आरडा-ओरड करण्यास सुरुवात केली. "माझ्या बॉयफ्रेंडला आत्ताच इथे बोलवा, नाहीतर मी वरून उडी मारून जीव देईन," अशी धमकी तिने उपस्थित नागरिकांना दिली.

या घटनेची माहिती पसरताच टॉवरखाली बघ्यांची मोठी गर्दी जमली. तरुणीचे आई-वडीलही तातडीने घटनास्थळी पोहोचले आणि त्यांनी तिला खाली उतरण्यासाठी विनवणी केली, परंतु ती आपल्या मतावर ठाम राहिली. घटनेचे गांभीर्य लक्षात घेऊन स्थानिक पोलिस आणि नगर परिषदेची टीम घटनास्थळी दाखल झाली. पोलिसांनी तिला समजावण्याचा प्रयत्न केला, मात्र ती कोणाचेही ऐकण्याच्या मनस्थितीत नव्हती.

अखेर, परिस्थिती हाताबाहेर जाऊ नये म्हणून पोलिसांनी त्या तरुणीच्या बॉयफ्रेंडला घटनास्थळी बोलावले. तरुणाने लग्नास होकार दिल्यानंतरच तरुणी सायंकाळी सात वाजता टॉवरवरून खाली उतरली. पोलिसांनी दोघांनाही ताब्यात घेऊन पोलीस ठाण्यात आणले आहे. प्राथमिक चौकशीत हे प्रकरण प्रेमसंबंधांचे असल्याचे समोर आले असून, मुलीचे कुटुंबीय या लग्नाच्या विरोधात होते, त्यामुळेच तिने हे टोकाचे पाऊल उचलल्याचे स्पष्ट झाले आहे.