गर्भलिंग निदान रॅकेटचा पर्दाफाश! बी.ए.एम.एस. डॉक्टर आणि तोतया 'डॉक्टर' अटकेत; दौंड न्यायालयातून ५ दिवसांची कोठडी

केडगाव (दौंड ) ; पुणे जिल्ह्यातील दौंड तालुक्यातील केडगाव परिसरात सुरू असलेल्या एका धक्कादायक गर्भलिंग निदान रॅकेटचा यवत  पोलिसांनी पर्दाफाश केला आहे. या प्रकरणी पोलिसांनी डॉ. अतुल  जाधव याला अटक केली असून, त्याला दौंड न्यायालयात हजर केले असता न्यायालयाने त्याला ५ दिवसांची पोलीस कोठडी सुनावली आहे. या कारवाईमुळे परिसरात एकच खळबळ उडाली आहे.

काय आहे प्रकरण?
पोलिसांच्या तपासणीत महत्त्वाची माहिती हाती लागल्यानंतर डॉ.अतुल  जाधव राहणार वाघोली  याला ताब्यात घेण्यात आले. तपासादरम्यान एक अत्यंत धक्कादायक बाब समोर आली आहे, ती म्हणजे या रॅकेटमध्ये एक व्यक्ती 'अण्णा गिरी' नावाचा आहे, ज्याला गर्भलिंग निदानाचे तंत्र अवगत झाले आहे, मात्र तो मुळात डॉक्टरच नाही. दुसरीकडे, अटक करण्यात आलेला डॉ. जाधव याने बी.ए.एम.एस. (BAMS) ची पदवी मिळवली असली, तरी तो या बेकायदेशीर कृत्यात सहभागी होता.

मोठ्या टोळीचा उलगडा
तपासात असे समोर आले आहे की, हे केवळ एका व्यक्तीचे कृत्य नसून, ही एक मोठी टोळी (Gang) सक्रिय आहे. या टोळीमध्ये काही दलाल आणि इतर अनेक डॉक्टरांचा देखील समावेश असण्याची शक्यता पोलिसांनी व्यक्त केली आहे. गर्भलिंग निदान करणाऱ्या या रॅकेटचे जाळे किती मोठे आहे आणि यात आणखी कोणकोणते बडे मासे गुंतले आहेत, याचा सखोल तपास आता दौंड पोलीस करत आहेत.

या गुन्ह्यामुळे आरोग्य क्षेत्रात आणि समाजात संतापाची लाट पसरली आहे. गर्भलिंग निदान प्रतिबंधक कायद्याचे (PCPNDT Act) उल्लंघन करणाऱ्यांवर कठोर कारवाई करण्याची मागणी जोर धरत आहे. या रॅकेटमधील इतर फरारी आरोपींचा शोध घेण्यासाठी पोलीस पथके रवाना झाली आहेत.