युट्युब, द इकॉनॉमिक टाइम्स व गुगलला पकड वॉरंट काढा, न्यायालयात अर्ज

पुणे : काँग्रेस नेते व लोकसभेतील विरोधी पक्षनेते श्री. राहुल गांधी यांच्या विरोधात दाखल करण्यात आलेल्या मानहानी प्रकरणात फिर्यादी सात्यकी सावरकर यांनी आज पुणे न्यायालयात एक अर्ज दाखल केला आहे.

या खटल्यात स्वातंत्र्यवीर विनायक दामोदर सावरकर यांच्याबाबत लंडन येथील ओव्हरसीज काँग्रेस कार्यक्रमात भाषण करताना करण्यात आलेल्या कथित बदनामीकारक वक्तव्यांप्रकरणी स्वातंत्र्यवीर सावरकर यांचे पंतू सात्यकी सावरकर यांनी पुणे येथील विशेष एमपी-एमएलए न्यायालयात राहुल गांधी यांच्या विरोधात बदनामीचा खटला दाखल केला आहे. सदर प्रकरणाची नियमित सुनावणी सुरू असून राहुल गांधी यांचे वकील अ‍ॅड. मिलिंद दत्तात्रय पवार हे सात्यकी सावरकर यांचा उलटतपास घेत आहेत.

या खटल्यात न्यायालयाने यापूर्वी दंड प्रक्रिया संहिता कलम ९१ अंतर्गत ‘द इकॉनॉमिक टाइम्स’ तसेच युट्युब/गुगल एलएलसी यांना मुळ असलेली आवश्यक कागदपत्रे व माहिती सादर करण्याचे आदेश दिले होते. संबंधित कंपन्यांकडून वकील न्यायालयात हजर राहिले होते, मात्र न्यायालयाच्या आदेशाचे पालन करण्यात आले नसल्याचे अर्जात नमूद करण्यात आले आहे.

फिर्यादी पक्षाने यापूर्वीही संबंधितांविरोधात वॉरंट जारी करण्यासाठी अर्ज दाखल केला असून तो अर्ज १७ मार्च २०२६ पासून प्रलंबित असल्याचे सांगण्यात आले आहे.

आज दाखल करण्यात आलेल्या नव्या अर्जात ‘द इकॉनॉमिक टाइम्स’चे प्रिंटर, पब्लिशर तसेच युट्युब/गुगल एलएलसीच्या संबंधित अधिकाऱ्यांविरोधात न्यायालयाने अजामीनपात्र वॉरंट जारी करावेत, अशी मागणी फिर्यादीकडून करण्यात आली आहे.

फिर्यादी पक्षाच्या मते न्यायालयाच्या आदेशाचे जाणीवपूर्वक पालन टाळण्यात आले असून न्यायालयीन प्रक्रियेला सहकार्य करण्यात आलेले नाही.

सदर पकड वॉरंट काढण्याच्या अर्जावर न्यायालय १ जून २०२६ रोजी आदेश पारित करणार आहे. तसेच आज फिर्यादी सात्यकी सावरकर न्यायालयात उपस्थितीत नसल्याने पुढील उलटतपास अ‍ॅड. मिलिंद दत्तात्रय पवार हे १ जून २०२६ रोजी करणार आहेत.