Devendra Fadnavis on Maratha Andolan

Devendra Fadnavis on Maratha Andolan : जालन्यातील अंतरवाली सराटी गावात मराठा आरक्षणासाठी उपोषण करणाऱ्या आंदोलकांवर शुक्रवारी पोलिसांकडून लाठीहल्ला करण्यात आला. त्यामुळे या लाठीहल्ल्यात अनेक आंदोलक जखमी झाले. तसेच काही पोलीसही जखमी झाले. त्यानंतर शिंदे सरकारवर मोठ्या प्रमाणात टीका झाली. या प्रकरणावरून उपमुख्यमंत्री देवेंद्र फडणवीस यांनी माफी मागत दोषींवर कारवाई करणार असल्याची ग्वाही दिली.

मुख्यमंत्री एकनाथ शिंदे यांच्या अध्यक्षतेखाली मराठा आरक्षणासाठी बैठक झाली. या बैठकीनंतर उपमुख्यमंत्री देवेंद्र फडणवीस,उपमुख्यमंत्री अजित पवार आणि मुख्यमंत्री एकनाथ शिंदे यांची पत्रकार परिषद झाली.

या पत्रकार परिषदेत उपमुख्यमंत्री देवेंद्र फडणवीस म्हणाले, 'मुख्यमंत्री एकनाथ शिंदे यांच्या अध्यक्षतेखाली बैठक पार पडली. बैठकीला खासदार उदयनराजे भोसले होते. तसेच माजी खासदार संभाजीराजे देखील फोनवर होते. यावेळी राज्यातील परिस्थितीवर चर्चा झाली. मागण्यांच्या संदर्भात ही चर्चा झाली'.

'जालन्यात जे काही झालं ते दुर्दैवी होतं. त्याचं समर्थन होऊ शकत नाही. मी मुख्यमंत्री असताना अनेक आंदोलने झाली, पण बळाचा वापर झाला नाही. या लाठीहल्ला प्रकरणात ज्यांना त्रास झाला, त्यांची माफी मागतो. दोषींवर कारवाई होणार, अशी ग्वाही देवेंद्र फडणवीस यांनी दिली.

Amravati News: संशयाचं भूत मानगुटीवर बसलं, तरुणाने आईसह सख्ख्या भावाला संपवलं; मोर्शीतील दुहेरी हत्याकांडांचा उलगडा

'या प्रकरणाचं राजकारण योग्य नाही. काही पक्ष तसेच करत आहेत. लाठीचार्ज करण्यासाठी आदेश एसपी, डीएसपी यांच्या स्तरावर होतो. मावळ येथे काही झालं, त्याला तेव्हाचे मुख्यमंत्री जबाबदार होते का? असा सवाल देवेंद्र फडणवीस यांनी केला.

'लोकांना यातील राजकारण दिसतं. मराठा आरक्षण २०१८ साली आलं. उच्च न्यायालयाने मान्य देखील केलं. आमचं सरकार असताना देखील सर्वोच्च न्यायालयाने त्यावर बंदी आणली नव्हती. मात्र सरकार बदलल्या नंतर हे झालं. उद्धव ठाकरे म्हणतात वटहुकूम काढा, मग त्यांनी का केलं नाही. आमच्या काळात ओबीसीप्रमाणे सगळ्या सुविधा मराठा समाजाला मिळाल्या, असे ते म्हणाले.

'अनेक योजना सुरू केल्या. विद्यार्थ्यांना रहिवाशी भत्ता सुरू केला, यूपीएससी आणि एमपीएससी च्या शिक्षणासाठी सोय केली. परदेशी शिष्यवृती योजना सुरू केली. सर्व निर्णय महायुतीच्या काळातच झाले. आम्ही मराठा आरक्षण सुप्रीम कोर्टात टिकवण्याचं काम केलं. आज पुळका आल्यासारखे वागत आहेत, त्यांनी घालवण्याचं काम केलं, असेही देवेंद्र फडणवीस म्हणाले.

अजित पवारांची मराठा आरक्षणावर प्रतिक्रिया

अजित पवार यावेळी म्हणाले, ' मी दोन दिवस आजारी होतो, त्यामुळे बाहेर पडू शकलो नाही. जालन्यात जे झाले ते व्हायला नको होतं, ही सगळ्यांचीच मागणी आहे. काही लोक त्याची राजकीय पोळी भाजत आहेत'.

'अनेक समाज आरक्षणाची मागणी करतात, पण तो कायद्याच्या कसोटीत बसायला हवा. देवेंद्र फडणवीस यांनी दिलेल आरक्षण उच्च न्यायालयात टिकलं. कोणत्या कारणाने टिकलं नाही, याचा अभ्यास गरजेचा आहे, असे ते म्हणाले.