Pune : शिवसेनेच्या प्रचारावेळी पुण्यात गोंधळ; शहरप्रमुखांच्या वाहनावर दगडफेक, उमेदवाराला दुखापत

Pune : महानगरपालिका निवडणुकीच्या रणधुमाळीत पुण्यात राजकीय तणाव वाढला असून, हडपसर परिसरातील काळेपडळ येथे एका प्रचाराच्या मोहिमेला हिंसक वळण लागले. उपमुख्यमंत्री एकनाथ शिंदे यांच्या शिवसेनेचे पुणे शहरप्रमुख नाना भानगिरे यांच्या ताफ्यावर अज्ञातांनी हल्ला चढवला. या घटनेत भानगिरे यांच्या वाहनाचं नुकसान झालं असून, महिला उमेदवार सारिका पवार यादेखील जखमी झाल्या आहेत.

मिळालेल्या माहितीनुसार, बुधवारी सायंकाळी आठच्या सुमारास नाना भानगिरे आणि प्रभाग क्रमांक ४१ च्या उमेदवार सारिका पवार हे आपल्या कार्यकर्त्यांसह हडपसरमधील काळेपडळ येथील मयूर जेएमएनएस सोसायटी परिसरात मतदारांच्या गाठीभेटी घेण्यासाठी गेले होते. यावेळी अचानक काही समाजकंटकांनी त्यांच्या दिशेने दगडफेक सुरू केली. या हल्ल्यात भानगिरे यांच्या कारची काच फुटली, तर एक दगड लागल्याने उमेदवार सारिका पवार यांच्या हाताला दुखापत झाली.

Pune : अजित पवारांवर गंभीर आरोप; ‘महाराष्ट्रातील भ्रष्टाचाराचा सूत्रधार’ म्हणत भाजप आमदार महेश लांडगे यांचा जोरदार हल्लाबोल

हल्ल्याची माहिती मिळताच परिसरात गोंधळाचे वातावरण निर्माण झाले होते. घटनेचे वृत्त समजताच काळेपडळ पोलीस ठाण्याचे पथक तातडीने घटनास्थळी दाखल झाले. याप्रकरणी वरिष्ठ पोलीस निरीक्षक मानसिंग पाटील यांनी दिलेल्या माहितीनुसार, परिसरातील सीसीटीव्ही कॅमेऱ्यांचे चित्रीकरण तपासले जात असून हल्लेखोरांची ओळख पटवण्याचे काम युद्धपातळीवर सुरू आहे. दोषींवर कडक कायदेशीर कारवाई करण्याचे आश्वासन पोलिसांनी दिले आहे.

दरम्यान, निवडणुकीच्या काळात अशा प्रकारे भ्याड हल्ला करणे चुकीचे असल्याचं नाना भानगिरे यांनी म्हटलं आहे. या संदर्भात पोलीस ठाण्यात अधिकृत तक्रार दाखल करण्याची प्रक्रिया रात्री उशिरापर्यंत सुरू होती. या घटनेमुळे परिसरात तणावपूर्ण शांतता असून पोलीस बंदोबस्त वाढवण्यात आला आहे.