Pune : अजित पवारांवर गंभीर आरोप; ‘महाराष्ट्रातील भ्रष्टाचाराचा सूत्रधार’ म्हणत भाजप आमदार महेश लांडगे यांचा जोरदार हल्लाबोल

Pimpri-Chinchwad : राज्याचे उपमुख्यमंत्री अजित पवार हेच महाराष्ट्रातील भ्रष्टाचाराचे ‘आका’ असल्याचा आरोप भाजप आमदार महेश लांडगे यांनी केला आहे. पिंपरी-चिंचवडमधील भ्रष्टाचाराच्या आकाला संपवायचं आहे, असा थेट इशारा अजित पवारांनी दिल्यानंतर आज आमदार महेश लांडगे यांनी त्यांना प्रत्युत्तर दिलं. 70 हजार कोटींच्या कथित घोटाळ्याच्या आरोपावरून महेश लांडगे यांनी अजित पवारांना लक्ष्य केलं. “70 हजार कोटींचा घोटाळा करणारे अजित पवार हेच महाराष्ट्रातील भ्रष्टाचाराचे आका आहेत. आम्हीही पुराव्यानिशी आरोप करू, पण ते आरोप त्यांना सहन होणार नाहीत,” असं लांडगे म्हणाले.

“उमेदवारी मागायला कुणी येत नसल्याने अजित पवार चिडचिड करत आहेत. चिठ्ठी वाचून स्क्रिप्टेड भाषण करणं ही त्यांची सवय झाली आहे. त्यांच्याकडे मोठे डायरेक्टर आणि चाणक्य असतील, पण बिनबुडाचे आरोप करू नयेत,” असा इशाराही महेश लांडगे यांनी दिला. "1991 पासून अजित पवार पिंपरी-चिंचवडच्या राजकारणात सक्रिय असून ते कायम सत्तेत राहिले आहेत. ते राज्याचं नेतृत्वही करू शकले, मात्र त्यांनी नेमकं काय केलं? उंटावर बसून शेळ्या हाकण्याचंच काम केलं,” असा घणाघात लांडगे यांनी केला.

Badlapur : बदलापूर MIDC हादरलं! एका कंपनीत अचानक ८ ते १० स्फोट; भीतीचं वातावरण, अग्निशामक दलाच्या १० गाड्या घटनास्थळी तैनात

“शरद पवारांमुळेच अजित पवार पिंपरी-चिंचवडमध्ये आले आणि त्यांची ओळख निर्माण झाली. मात्र आज तेच अजित पवार शरद पवारांना सोडून भाजपसोबत आले आहेत. भ्रष्टाचार लपवण्यासाठीच ते भाजपसोबत आले आहेत का?” असा थेट सवालही लांडगे यांनी उपस्थित केला.

“माझ्या संपत्तीवर बोलण्याऐवजी अजित पवारांनी स्वतःची जुनी आणि सध्याची परिस्थिती पाहावी. ते गेली 25 वर्षे पुणे जिल्ह्याचे पालकमंत्री आहेत, पाच वेळा उपमुख्यमंत्री राहिले आहेत,” असं म्हणत त्यांनी अजित पवारांच्या संपत्तीकडेही बोट दाखवलं.

अजित पवारांनी नेहमीच स्थानिक भूमिपुत्रांना डावललं असून कुणालाही मोठं होऊ दिलं नाही, असा आरोप करत “सध्या राष्ट्रवादीची अवस्था अत्यंत बिकट आहे. त्यांना 128 उमेदवारही मिळाले नाहीत. स्वतःचं झाकून ठेवायचं आणि दुसऱ्याचं वाकून पाहायचं हीच त्यांची वृत्ती आहे,” अशी टीका महेश लांडगे यांनी केली.

अजित पवार नेमकं काय म्हणाले होते?

“महानगरपालिकेत भ्रष्टाचार करणाऱ्या आकाला संपवायचं आहे. त्या आकाला जागा दाखवायची आहे,” असं म्हणत उपमुख्यमंत्री अजित पवार यांनी आमदार महेश लांडगे यांचं नाव न घेता टीका केली होती. याच वक्तव्याला प्रत्युत्तर देत आज आमदार महेश लांडगे यांनी अजित पवारांचा खरपूस समाचार घेतला.