कोल्हापुरात राडा! मुलाने पोलिसाची कॉलर पकडली, तर काँग्रेस शहराध्यक्षाने आडवी मारली गाडी; 'कोर्ट माझं काही वाकडं करू शकत नाही' म्हणत थेट आव्हान!

कोल्हापूर: कोल्हापूर शहरात मध्यरात्रीच्या सुमारास राजकीय मुजोरी आणि पोलिसांवर हल्याचा एक अत्यंत धक्कादायक प्रकार समोर आला आहे. काँग्रेसचे कोल्हापूर शहराध्यक्ष आणि महापालिका स्थायी समितीचे माजी अध्यक्ष सचिन प्रल्हाद चव्हाण आणि त्यांचा २१ वर्षीय मुलगा चंद्रसेन चव्हाण यांच्याविरुद्ध पोलिसांची कॉलर पकडणे, शिवीगाळ करणे आणि शासकीय कामात अडथळा आणल्याप्रकरणी जुना राजवाडा पोलीस ठाण्यात गुन्हा दाखल करण्यात आला आहे. रंकाळा तलाव परिसरातील फिटनेस सेंटर आणि टिंबर मार्केटच्या कमानीसमोर हा सर्व हायव्होल्टेज ड्रामा घडला.

नेमकी घटना काय घडली?
जुना राजवाडा पोलीस ठाण्याचे हेडकॉन्स्टेबल सचिन दादू कुंभार यांनी या प्रकरणी फिर्याद दिली आहे. मंगळवारी मध्यरात्री पोलीस कर्मचारी नेहमीप्रमाणे रंकाळा परिसरामध्ये गस्त घालत होते. त्यावेळी रंकाळा तलावाजवळील फिटनेस सेंटर समोरील कमानीच्या परिसरात काही तरुण मोठ्याने आरडाओरडा करत दंगामस्ती करताना पोलिसांना आढळले. पोलिसांनी रात्रीच्या वेळी शांतता राखण्याचे आवाहन करत या तरुणांना समज देण्याचा प्रयत्न केला.

मात्र, त्या टोळक्यात असलेल्या चंद्रसेन सचिन चव्हाण (वय २१, रा. लाड चौक, शिवाजी पेठ) याने पोलिसांशी अत्यंत उद्धटपणे वाद घालण्यास सुरुवात केली. वाद इतका वाढला की चंद्रसेनने थेट ऑन-ड्यूटी पोलीस अंमलदार कुंभार यांच्या शासकीय गणवेशाची कॉलर पकडली आणि "तुम्ही मला शिकवणार का? काय करायचे ते करा," अशी धमकी दिली.

बापाने आडवे लावले वाहन; कोर्टालाही दिले आव्हान
पोलिसांवर हात टाकल्यामुळे कर्मचाऱ्यांनी तातडीने चंद्रसेनला ताब्यात घेतले आणि त्याला सरकारी गाडीत बसवून पोलीस ठाण्याकडे घेऊन जाण्यास निघाले. मात्र, हा निरोप मिळताच त्याचे वडील आणि काँग्रेसचे शहराध्यक्ष सचिन चव्हाण हे स्वतःच्या चारचाकी वाहनातून तिथे पोहोचले. त्यांनी टिंबर मार्केट कमानीसमोर आपले वाहन थेट पोलिसांच्या गाडीसमोर आडवे लावले आणि पोलिसांचा रस्ता अडवला.

"माझ्या मुलाला कसे घेऊन जाता ते पाहतोच, काय कारवाई करायची ती करा," अशी दर्पोक्ती करत सचिन चव्हाण यांनी पोलिसांशी तीव्र हुज्जत घातली. धक्कादायक बाब म्हणजे, "कोर्ट माझं काही वाकडं करू शकत नाही," असे म्हणत त्यांनी थेट न्यायव्यवस्थेला आणि कायदा-सुव्यवस्थेला आव्हान दिले.

पिता-पुत्रावर गुन्हा दाखल
पोलिसांनी या दबावाला बळी न पडता दोन्ही आरोपींवर शासकीय कामात अडथळा आणणे, पोलिसांवर हल्ला करणे, धमकावणे आणि शिवीगाळ करणे या कलमांखाली गुन्हा दाखल केला आहे. या घटनेमुळे कोल्हापुरातील राजकीय आणि सामाजिक वर्तुळात तीव्र संताप व्यक्त होत असून, खाकी वर्दीचा आदर न करणाऱ्या आणि कायदा हातात घेणाऱ्या या नेत्यावर कडक कारवाई करण्याची मागणी नागरिकांमधून केली जात आहे.