Chhatrapati Sambhajinagar: 20 वर्षीय लेकीचा मृतदेह गादीत गुंडाळला अन् पोलिसांनी पकडलं, घातपात की प्रेमप्रकरण?

Chhatrapati Sambhajinagar Crime News: छत्रपती संभाजीनगरजवळील तिसगाव चौफुली इथं एक धक्कादायक घटना समोर आली आहे. एका 20 वर्षीय तरुणीचा मृतदेह गादीत गुंडाळल्याचे आणि तिला अंत्यसंस्कारासाठी गावी नेत असल्याची माहिती समोर आली. घरातील सामानासोबत एका रिक्षातून तरुणीचा मृतदेह संशयास्पदरित्या नेताना पोलिसांनी तो या चौफुलीवर पकडला. प्रेमसंबंधातून तरुणीने गळफास घेतल्याचा आणि तिला गावी नेत असल्याचा दावा तिच्या सावत्र आईने केला. प्रकरणात आई-वडील ताब्यात घेऊन वाळूज पोलीस कडून तपास करण्यात येत आहे.

काय आहे घटना?

काल एका रिक्षातून काही लोक घरातील साहित्यासह गावाकडे जात होते. मात्र, तिसगाव चौफुली परिसरात पोलिसांनी या रिक्षातील हालचाली संशयास्पद वाटल्या. पोलिसांनी मग रिक्षा थांबवली. पोलिसांनी रिक्षाची तपासणी केली. त्यावेळी त्यांना काही घरगुती वापराचे सामान आढळले. पण गादी पाहिली असता त्यात कुणीतरी गुंडाळल्याचे त्यांना आढळून आले. त्यात 20 वर्षीय तरुणी गुंडाळलेल्या अवस्थेत आढळली. पोलिसही हा प्रकार पाहून चक्रावून गेले. त्यांनी मग आई-वडिलांची झाडाझडती घेतली. तेव्हा अजून धक्कादायक बाबी समोर आल्या.

प्रेमसंबंधातून जीवन संपवले

पोलिसांनी आई-वडिलांकडे या प्रकाराबद्दल विचारणा केली. मुलीच्या सावत्र आईने त्यावेळी पोलिसांना सांगितले की, मुलीचे प्रेमसंबंध होते. त्यातून तिने गळफास घेतला आणि जीवन संपवले. बदनामी टाळण्यासाठी आणि गावाकडे अत्यंसंस्कारासाठी तिचा मृतदेह गुपचूप नेत होतो. पण पोलिसांनी त्यांच्या दाव्याबाबत संशय आहे. त्यामुळे पोलिसांनी दोघांची कसून चौकशी सुरू केली आहे.

आत्महत्या की घातपात?

हा प्रकार आत्महत्येचा आहे की घातपाताचा याचा तपास आता वाळूज एमआयडीसी पोलीस करत आहेत. पोलिसांनी मुलीच्या वडिलांना आणि सावत्र आईला चौकशीसाठी ताब्यात घेतले आहे. पोलिसांनी याप्रकरणी संशयास्पद मृत्यूची नोंद केली आहे. शवविच्छेदन अहवाल आल्यानंतर वीस वर्षीय तरुणीच्या मृत्यूचे नेमके कारण समोर येईल. पण सध्या तरी या घटनेवरून अनेक तर्क-वितर्कांना उधाण आले आहे.  या मृत्यूचे कारण समोर आल्यावर पुढील कारवाई करण्यात येईल.