'आप' आमदाराच्या अडचणीत दुहेरी वाढ! खंडणी प्रकरणात अटकेनंतर आता थेट 'ईडी'चे समन्स

पंजाब: आम आदमी पक्षाच्या आमदाराला ईडीचे समन्स; बेहिशोबी मालमत्ता आणि खंडणी प्रकरणात पंजाब दक्षता ब्युरोने केलीय आधीच अटक पंजाबमधील सत्ताधारी आम आदमी पक्षाचे (AAP) आमदार रमण अरोरा यांच्या अडचणीत कमालीची वाढ झाली आहे. जालंधर सेंट्रल मतदारसंघाचे प्रतिनिधित्व करणाऱ्या आमदार रमण अरोरा यांना अंमलबजावणी संचालनालयाने (ED) मनी लाँड्रिंग (पैशांची बेकायदेशीर अफरातफर) प्रकरणी चौकशीसाठी समन्स बजावले आहे.

केंद्रीय तपास यंत्रणेने त्यांना २ जून रोजी जालंधर येथील ईडी कार्यालयात हजर राहण्याचे आदेश दिले आहेत, जिथे प्रिव्हेंशन ऑफ मनी लाँड्रिंग ॲक्ट (PMLA) अंतर्गत त्यांचा जबाब नोंदवला जाईल. विशेष म्हणजे, उत्पन्नापेक्षा जास्त संपत्ती जमा केल्याप्रकरणी आणि खंडणीच्या आरोपाखाली पंजाब दक्षता ब्युरोने
(Vigilance Bureau) त्यांना नुकतीच २३ मे रोजी अटक केली असून ते सध्या पोलीस कोठडीत आहेत. ९०० पानांचे आरोपपत्र आणि खंडणीचे रॅकेटपंजाब दक्षता ब्युरोने न्यायालयात दाखल केलेल्या ९०० पानांच्या सविस्तर आरोपपत्रात आमदार रमण अरोरा यांच्यावर अत्यंत गंभीर आरोप केले आहेत.

प्राथमिक तपासात अरोरा यांच्याकडे १.१० कोटी रुपयांची बेहिशोबी मालमत्ता असल्याचे उघड झाले आहे. आरोपपत्रात नमूद केल्यानुसार, आमदार अरोरा यांनी महानगरपालिकेच्या इमारत विभागातील असिस्टंट टाउन प्लॅनर (ATP) सुखदेव वशिष्ठ आणि इतर अधिकाऱ्यांशी हातमिळवणी केली होती.
हे दोघे मिळून जालंधरमधील व्यावसायिक, व्यापारी आणि निवासी इमारतींच्या मालकांना बेकायदेशीर किंवा त्रुटी असलेल्या नोटिसा पाठवायचे. त्यानंतर इमारतींवर कारवाई करण्याची किंवा सील ठोकण्याची भीती दाखवून संबंधित व्यावसायिकांकडून लाखो रुपयांची खंडणी वसूल केली जायची.

सुरुवातीला १० लाखांची मागणी करून २ ते ५ लाख रुपयांमध्ये तोडपाणी केली जात असल्याचे तपासात समोर आले आहे. अनेक अधिकारीही जाळ्यातया मोठ्या खंडणी रॅकेटप्रकरणी केवळ आमदारच नाही, तर पालिकेच्या इमारत विभागाच्या दोन अधिकाऱ्यांसह इतर तीन जणांनाही अटक करण्यात आली आहे.
यापूर्वी २३ मे रोजी दक्षता ब्युरोने केलेल्या कारवाईदरम्यान अरोरा यांच्या निवासस्थानातून ६ लाख रुपयांची रोकड, १.२ किलो सोन्याचे दागिने आणि ७० ते ८० बेकायदेशीर नोटिसा जप्त करण्यात आल्या होत्या, ज्यांचा वापर खंडणीसाठी केला जात होता.

जालंधर पोलिसांतही स्वतंत्र गुन्हे दाखलया प्रकरणात आणखी एक वेगळा पेच म्हणजे, जालंधर कमिशनर पोलिसांनी गेल्या वर्षी २३ ऑगस्ट रोजी आमदार रमण अरोरा यांच्याविरुद्ध एका पार्किंग कंत्राटदाराला धमकावून खंडणी मागितल्याप्रकरणी स्वतंत्र गुन्हा दाखल केला होता. या प्रकरणात त्यांना २२ सप्टेंबर रोजी
न्यायालयाने जामीन मंजूर केला होता, परंतु नव्या भ्रष्टाचाराच्या आणि खंडणीच्या गुन्ह्यात त्यांना पुन्हा अटक करण्यात आली आहे. आता या सर्व प्रकरणांमधील गुन्ह्यातून आलेला पैसा (Proceeds of Crime) कुठे गुंतवला गेला आणि त्याचे मनी लाँड्रिंग झाले का, याचा तपास करण्यासाठी ईडीने उडी घेतली आहे.

या ताज्या समन्समुळे पंजाबच्या राजकारणात आणि 'आप' वर्तुळात मोठी खळबळ उडाली आहे.