अहिल्यानगरचा 'काश्मीर' म्हणतात ते उगाच नाही! लव्हाळवाडीचे निसर्गसौंदर्य, भंडारदरा बॅकवॉटर आणि हिरवाई पाहून तुम्हीही म्हणाल, 'इथे एकदा जायलाच हवं'

अहिल्यानगर (विशेष वृत्त - नवनाथ खराडे): रोजच्या धकाधकीच्या आणि दगदगीच्या आयुष्यातून कुठे तरी दूर, शांत आणि निसर्गरम्य वातावरणात जायचं असेल, तर अहिल्यानगर जिल्ह्यातील अकोला तालुक्यातील लव्हाळवाडीची वाट धरायला हवी. चारही बाजूंनी सह्याद्रीच्या भव्य आणि विस्तीर्ण डोंगररांगा, तर रस्त्याच्या दुतर्फा भंडारदरा धरणाच्या फुगवट्याचे (बॅकवॉटर) निळेशार पाणी असा विलोभनीय नजराणा येथे पाहायला मिळतो. या पाण्यातून वाट काढत पुढे जात असताना, आपली गाडी एखाद्या बोटीसारखी पाण्यातून तरंगत चालल्याचा भास होतो. हा संपूर्ण प्रवास अगदी एखाद्या चित्रपटातील दृश्यासारखा सुंदर आणि रोमांचक अनुभव देतो.

सह्याद्रीच्या कुशीत वसलेलं लव्हाळवाडी हे ठिकाण सध्या पर्यटकांसाठी एक उत्तम पर्यटन केंद्र म्हणून उदयास येत आहे. येथील थंडगार हवामान, धुक्याने नटलेले डोंगर, खळाळणारे छोटे-मोठे धबधबे आणि चारों बाजूंना पसरलेली दाट हिरवाई यामुळे या गावाला 'अहिल्यानगरचे काश्मीर' म्हणून ओळखले जाते. निसर्गाच्या सानिध्यात काही क्षण शांततेत घालवण्यासाठी आणि शहराच्या कोलाहलापासून दूर जाण्यासाठी हा परिसर पर्यटकांना भुरळ पाडत आहे.

या गावाची आणखी एक महत्त्वाची वैशिष्ट्ये म्हणजे हे 'मधाचे गाव' म्हणूनही प्रसिद्ध होत आहे. येथील निसर्गरम्य वातावरण, जैवविविधता आणि शांत पर्यटन अनुभवांमुळे शनिवार-रविवारच्या सुट्ट्यांमध्ये किंवा ट्रॅफिकपासून दूर निवांत वेळ घालवण्यासाठी पर्यटक येथे मोठ्या प्रमाणावर गर्दी करत आहेत. जर तुम्हाला खऱ्या अर्थाने निसर्गाचा आनंद घ्यायचा असेल, तर लव्हाळवाडीची ही सफर नक्कीच आयुष्यभर लक्षात राहणारी ठरेल.