सर्वसामान्यांना सलग झटके! १० दिवसांत तिसऱ्यांदा पेट्रोल-डिझेल महागले; इंधनाचा भडका, पाहा नवे दर!

नवी दिल्ली/मुंबई: जागतिक बाजारपेठेतील घडामोडी आणि वाढत्या तणावाचा थेट फटका भारतातील सर्वसामान्य नागरिकांच्या खिशाला बसत आहे. देशभरात पेट्रोल आणि डिझेलच्या किमतीत पुन्हा एकदा मोठी वाढ करण्यात आली आहे. विशेष म्हणजे, गेल्या अवघ्या १० दिवसांतील ही सलग तिसरी दरवाढ असल्याने जनतेमधून तीव्र संताप व्यक्त होत आहे. या नव्या दरवाढीमुळे भाजीपाला, वाहतूक आणि पर्यायाने रोजच्या जगण्याचा खर्च वाढण्याची भीती निर्माण झाली आहे.

किती झाली दरवाढ?
नव्याने झालेल्या दरवाढीनुसार, पेट्रोलच्या दरात प्रति लिटर ८७ पैशांची तर डिझेलच्या दरात प्रति लिटर ९१ पैशांची वाढ करण्यात आली आहे. यापूर्वी १५ मे रोजी इंधनाचे दर थेट ३ रुपयांनी वाढले होते, तर त्यानंतर १९ मे रोजी पुन्हा एकदा ९० पैशांची वाढ करण्यात आली होती. अवघ्या १० दिवसांत देशात पेट्रोल-डिझेल तब्बल ५ रुपयांच्या आसपास महागले आहे.

देशातील प्रमुख शहरांमधील नवे दर:

दिल्ली: दिल्लीत पेट्रोल ८७ पैशांनी महागून ९९.५१ रुपये प्रति लिटर तर डिझेल ९१ पैशांच्या वाढीसह ९२.४९ रुपये प्रति लिटरवर पोहोचले आहे.

मुंबई: मुंबईत पेट्रोलचा दर १०८.४ रुपये प्रति लिटर तर डिझेल ९५ रुपये प्रति लिटर झाला आहे.

कोलकाता: कोलकातामध्ये पेट्रोल ११०.६ रुपये आणि डिझेल ९७ रुपये प्रति लिटरवर गेले आहे.

चेन्नई: चेन्नईत पेट्रोल १०५.३ रुपये तर डिझेल ९६.९ रुपये प्रति लिटर दराने विकले जात आहे.

इंधन महागण्याचे मुख्य कारण काय?
आंतरराष्ट्रीय स्तरावर अमेरिका आणि इराणमधील वाढता संघर्ष तसेच पश्चिम आशियातील (West Asia) भू-राजकीय तणावामुळे कच्च्या तेलाच्या (Crude Oil) किमती सातत्याने चढ्या राहिल्या आहेत. जागतिक बाजारात ब्रेंट क्रूड प्रति बॅरल १०० डॉलरच्या वर व्यापार करत आहे. भारत आपल्या गरजेच्या तब्बल ८८ टक्के कच्चे तेल आयात करतो. तेल पुरवठा करणाऱ्या महत्त्वाच्या सागरी मार्गांवर झालेल्या परिणामांमुळे आयातीचा खर्च प्रचंड वाढला असून, देशांतर्गत तेल कंपन्यांनी हा बोजा आता थेट ग्राहकांवर टाकण्यास सुरुवात केली आहे. सलग होत असलेल्या या दरवाढीमुळे मध्यमवर्गीय आणि नोकरदार वर्गाचे मासिक आर्थिक गणित पूर्णपणे विस्कटले आहे.