लखनऊ: शिक्षणाचा खेळ; जेन-झीनंतर आता जेन-अल्फा आक्रमक; लखनऊमध्ये विद्यार्थ्यांचे रस्त्यावर उतरून आंदोलन

लखनऊ: देशातील शिक्षण व्यवस्थेतील त्रुटी आणि शिक्षकांच्या तीव्र कमतरतेमुळे आता नवीन पिढी म्हणजेच 'जेन-अल्फा' (Gen Alpha) देखील आक्रमक झाली आहे. जंतर मंतर आणि झारखंडमध्ये झालेल्या जेन-झींच्या आंदोलनानंतर, आता लखनऊमधील जयप्रकाश नारायण शाळेच्या शेकडो विद्यार्थ्यांनी रस्त्यावर उतरून आपल्या शिक्षणाच्या अधिकारासाठी आंदोलन केले. आपल्या मागण्यांकडे सरकारचे लक्ष वेधण्यासाठी विद्यार्थ्यांनी बालागंज चौकात रस्ता रोखून धरला.

शाळेत पुरेसे शिक्षक नसल्यामुळे विद्यार्थ्यांच्या शिक्षणावर गंभीर परिणाम होत आहे. गेल्या अनेक दिवसांपासून ही समस्या कायम असतानाही प्रशासनाकडून योग्य पावले उचलली जात नसल्याने विद्यार्थ्यांचा संयम सुटला. सोमवारी सकाळी शेकडो विद्यार्थी एकत्र आले आणि त्यांनी मुख्य चौकात ठिय्या मांडला. या आंदोलनामुळे दुबग्गा रोडवरील वाहतूक व्यवस्था पूर्णपणे कोलमडली होती, ज्यामुळे सामान्य नागरिकांना मोठा मनस्ताप सहन करावा लागला.

या आंदोलनाची माहिती मिळताच स्थानिक पोलीस आणि प्रशासकीय अधिकारी तातडीने घटनास्थळी दाखल झाले. त्यांनी संतप्त विद्यार्थ्यांशी संवाद साधून परिस्थिती हाताळण्याचा प्रयत्न केला. विद्यार्थ्यांनी शिक्षकांच्या कमतरतेचा मुद्दा मांडला आणि शाळेत शिक्षक उपलब्ध करून देण्याची मागणी लावून धरली. अधिकाऱ्यांनी त्यांच्या मागण्यांवर सकारात्मक विचार करून त्या सरकारपर्यंत पोहोचवण्याचे आश्वासन दिल्यानंतर विद्यार्थ्यांनी आपले आंदोलन मागे घेतले.

विशेष म्हणजे, गेल्या शुक्रवारी याच सर्वोदय विद्यालयातील विद्यार्थ्यांनी गोंधळ घातला होता. त्यावेळी समाजकल्याण मंत्री असीम अरुण आणि विभागाचे संचालक अनुराग यादव यांनी स्वतः घटनास्थळी भेट देऊन सुधारणांचे आश्वासन दिले होते. मात्र, त्यानंतरही ठोस तोडगा न निघाल्याने विद्यार्थ्यांचा संताप वाढला आणि सोमवारी त्यांनी पुन्हा आंदोलनाचा पवित्रा घेतला. विद्यार्थ्यांच्या या वारंवार होणाऱ्या आंदोलनांमुळे सरकारी शाळांमधील शिक्षण व्यवस्थेचा दर्जा आणि शिक्षकांची रिक्त पदे यांवर मोठे प्रश्नचिन्ह निर्माण झाले आहे.