एअर इंडियाच्या फ्रँकफर्ट-दिल्ली विमानाचे जयपूरमध्ये आपत्कालीन लँडिंग; हायजॅक अलर्ट आणि 'Squawk 7500' कोडमुळे उडाली खळबळ!

नवी दिल्ली: जर्मनीतील फ्रँकफर्टवरून नवी दिल्लीच्या दिशेने येणाऱ्या एअर इंडियाच्या (Air India) विमानाबाबत एक अत्यंत मोठी आणि खळबळजनक घटना समोर आली आहे. विमान प्रवासात असताना पायलटेडडून 'हायजॅक अलर्ट' (Hijack Alert) मिळाल्यानंतर अहमदाबाद एअर ट्राफिक कंट्रोल (ATC) यंत्रणेत मोठी धावपळ उडाली. खबरदारीचा उपाय म्हणून एअर इंडियाचे विमान AI-2030 तातडीने जयपूर विमानतळावर सुरक्षितपणे उतरवण्यात आले (Emergency Landing). या घटनेमुळे संपूर्ण विमान वाहतूक आणि सुरक्षा यंत्रणांमध्ये प्रचंड खळबळ उडाली असून देशभरात एकच चर्चा सुरू आहे.

'Squawk 7500' कोड आणि आपत्कालीन लँडिंग

मिळालेल्या सविस्तर माहितीनुसार, फ्रँकफर्टहून दिल्लीकडे येणाऱ्या या विमानातील पायलटने काही सेकंदांसाठी विमान अपहरणाचा (Hijack) आंतरराष्ट्रीय संकेत असलेला 'Squawk 7500' हा आपत्कालीन कोड ट्रान्समिट केला होता. हा आपत्कालीन सिग्नल मिळताच अहमदाबाद येथील एअर ट्राफिक कंट्रोल रूम सतर्क झाली. त्यानंतर तातडीने दिल्ली विमानतळावरील वॉर रूम आणि सुरक्षा यंत्रणांशी समन्वय साधून विमान जयपूर आंतरराष्ट्रीय विमानतळाकडे वळवण्याचे निर्देश देण्यात आले.

सकाळी साधारण ९:३५ वाजता हे विमान (बोइंग ७८७-९) जयपूर विमानतळावर सुखरूप उतरवण्यात आले. विमानाचे लँडिंग झाल्यानंतर तातडीने विमानतळावरील सुरक्षा प्रोटोकॉल राबवत विमान एका सुरक्षित 'आयसोलेशन बे' (Isolation Bay) मध्ये हलवण्यात आले.

सुरक्षा यंत्रणांची मोठी कारवाई आणि तपास

विमान सुरक्षितपणे खाली उतरवल्यानंतर सुरक्षा यंत्रणांनी तत्परता दाखवत सर्व प्रवाशांना आणि कर्मचाऱ्यांना टप्प्याटप्प्याने सुखरूप खाली उतरवले. केंद्रीय औद्योगिक सुरक्षा दल (CISF), स्थानिक पोलीस, गुप्तचर यंत्रणा आणि राज्य दहशतवाद विरोधी पथक (ATS) यांनी संयुक्त मोहीम राबवत संपूर्ण विमानाची कसून तपासणी सुरू केली. तसेच प्रवाशांच्या सामानाचीही सखोल तपासणी केली जात आहे. प्राथमिक तपासात विमानातील सर्व ऑपरेशन्स सामान्य असल्याचे आढळले असले, तरी पायलटने हा आपत्कालीन कोड नेमका कोणत्या परिस्थितीमुळे किंवा तांत्रिक बिघाडामुळे पाठवला होता, याबाबतची सखोल चौकशी सध्या सुरू आहे. या घटनेमुळे विमान प्रवाशांमध्ये काही काळ भीतीचे वातावरण निर्माण झाले होते.