पुणे: लेखक संपत जाधव यांना पिस्तुलाचा धाक दाखवून मारहाण; सारसबाग परिसरातील घटना, पाच जणांवर गुन्हा दाखल

पुणे: पुण्यातील सारसबाग परिसरातील लोकशाहीर अण्णाभाऊ साठे पुतळा परिसरात लेखक संपत जाधव यांना शिवीगाळ करून पिस्तुलाचा धाक दाखवत मारहाण केल्याची धक्कादायक घटना घडली आहे. याप्रकरणी स्वारगेट पोलिसांनी पाच जणांविरुद्ध गुन्हा दाखल केला आहे.

नेमकी घटना काय?
मिळालेल्या माहितीनुसार, शनिवारी (१८ एप्रिल) रात्री सारसबाग येथील अण्णाभाऊ साठे पुतळा परिसरात मातंग समाजाच्या आरक्षणाबाबत एका बैठकीचे आयोजन करण्यात आले होते. रात्री १० च्या सुमारास बैठक संपल्यानंतर लेखक संपत गणपत जाधव तिथे थांबले होते. यावेळी काही आरोपींनी तिथे येऊन जाधव यांना शिवीगाळ करण्यास सुरुवात केली.

फिर्यादीवर हल्ला:
या घटनेत मध्यस्थी करण्याचा प्रयत्न करणारे दीपक कुंडलीक कसबे (वय ३५, रा. बिबवेवाडी) यांनाही आरोपींनी मारहाण केली. कसबे यांनी दिलेल्या फिर्यादीनुसार, आरोपींनी त्यांना जिवे मारण्याची धमकी दिली आणि पिस्तुलाचा धाक दाखवला. इतकेच नाही तर पिस्तुलाचा दस्ता कसबे यांच्या डोक्यात मारून त्यांना जखमी केले. आरोपींनी कसबे यांच्या डोक्यात गोळी झाडण्याची धमकी दिल्याने ते घाबरून आपला जीव वाचवण्यासाठी तिथून पळाले.

पेपर स्प्रेचा वापर:
पळून जाणाऱ्या कसबे आणि इतर कार्यकर्त्यांवर आरोपींनी 'पेपर स्प्रे' फवारला. तसेच त्यांना लाथाबुक्क्यांनी आणि पट्ट्याने बेदम मारहाण केली. या घटनेमुळे परिसरात काही काळ तणावाचे वातावरण निर्माण झाले होते.

पोलीस तपास:
याप्रकरणी स्वारगेट पोलीस ठाण्यात पाच जणांविरुद्ध गुन्हा दाखल करण्यात आला असून पोलीस उपनिरीक्षक शिरसाठ या प्रकरणाचा पुढील तपास करत आहेत. आरक्षणाच्या मुद्द्यावरून झालेल्या बैठकीनंतर हा हल्ला झाल्याने पोलिसांनी या घटनेचा गांभीर्याने तपास सुरू केला आहे.