Nanded : मॉर्निंग वॉकदरम्यान शिवसेना नेत्याची हत्या; तीन वर्षांपूर्वीही झाला होता जीवघेणा हल्ला, शहरात खळबळ

Nanded : नांदेड शहरात गुन्हेगारीच्या घटनांनी पुन्हा डोके वर काढले असून सोमवारी पहाटे घडलेल्या एका हत्याकांडाने खळबळ उडाली आहे. मॉर्निंग वॉकसाठी बाहेर पडलेल्या शिवसेना (शिंदे गट) कार्यकर्त्यावर अज्ञात हल्लेखोरांनी धारदार शस्त्राने हल्ला करून त्याची हत्या केली.

सोनू कल्याणकर (वय 35) असे मृत व्यक्तीचे नाव असून तो श्रीनगर परिसरातील रहिवासी होता. सोमवारी पहाटे साडेपाचच्या सुमारास तो नेहमीप्रमाणे मॉर्निंग वॉकसाठी घराबाहेर पडला होता. श्रीनगर मार्गावरून जात असताना तीन ते चार जणांनी त्याला घेरले आणि पोट व पाठीत वार करत गंभीर जखमी केले. रक्ताच्या थारोळ्यात पडलेल्या कल्याणकर याचा जागीच मृत्यू झाला.

घटनेची माहिती मिळताच पोलीस अधीक्षक अबिनाश कुमार, अप्पर पोलीस अधीक्षक सूरज गुरव आणि पोलीस निरीक्षक संतोष तांबे यांनी घटनास्थळी धाव घेतली. पोलिसांनी परिसराची नाकाबंदी करत हल्लेखोरांचा शोध सुरू केला आहे.

दरम्यान, गेल्या तीन दिवसांत नांदेडमध्ये झालेला हा पाचवा खून असल्याने शहरात भीतीचे वातावरण निर्माण झाले आहे.

तीन वर्षांपूर्वीही झाला होता हल्ला
विशेष म्हणजे, सोनू कल्याणकर याच्यावर तीन वर्षांपूर्वीही जीवघेणा हल्ला झाला होता. रींदा गँगशी संबंधित गोलू मंगनाळे याने त्याच्यावर गोळीबार केला होता. त्यावेळी तो थोडक्यात बचावला होता. सध्या गोलू मंगनाळे तुरुंगात असून या हत्येमागे त्याचा काही संबंध आहे का, याचा तपास पोलीस करत आहेत.

सोनू कल्याणकर हा राजकीय आणि सामाजिक क्षेत्रात सक्रिय होता. काही दिवसांपूर्वीच त्याने भाजप सोडून शिवसेना (शिंदे गट) मध्ये प्रवेश केला होता. या घटनेमुळे शहरात मोठी खळबळ उडाली असून नागरिकांमध्ये भीतीचे वातावरण पसरले आहे.