Pune : बास्केटबॉल पोस्टची रिंग डोक्यावर कोसळून 20 वर्षीय विद्यार्थ्याचा दुर्दैवी मृत्यू; कॉलेजचा वेगळा दावा

Pune : पुण्यातील मावळ तालुक्यातील तळेगाव परिसरात एक धक्कादायक घटना समोर आली आहे. बास्केटबॉल पोस्टवरील रिंग डोक्यावर कोसळल्याने 20 वर्षीय महाविद्यालयीन विद्यार्थी विशाल वर्मा याचा दुर्दैवी मृत्यू झाला. तो बीटेकच्या दुसऱ्या वर्षात शिक्षण घेत होता.

रविवारी सकाळी साडेसातच्या सुमारास ही घटना घडली. मिळालेल्या माहितीनुसार, विशाल बास्केटबॉलच्या मैदानातून जात असताना त्याने पोस्टवरील रिंगला हात लावला. त्यावेळी रिंग अचानक खाली कोसळली आणि अवजड लोखंडी भाग थेट त्याच्या डोक्यावर पडला. यात तो गंभीर जखमी झाला आणि मोठ्या प्रमाणात रक्तस्त्राव झाला.

घटनेनंतर काही वेळ विशाल बेशुद्ध अवस्थेतच पडून होता. त्याला रुग्णालयात नेण्यास विलंब झाल्याचा आरोप सहविद्यार्थ्यांनी केला आहे. तळेगावमधील खासगी रुग्णालयात दाखल केल्यानंतर डॉक्टरांनी त्याला मृत घोषित केले. विशाल हा उत्तर प्रदेशातील अयोध्या येथील रहिवासी असून तो पुण्यातील कॉलेजच्या वसतिगृहात राहत होता. घटनेची माहिती मिळताच त्याचे पालक पुण्यात दाखल झाले.

या घटनेनंतर महाविद्यालयातील विद्यार्थ्यांमध्ये संतापाची लाट उसळली. काही काळ तणावपूर्ण वातावरण निर्माण झाले होते. पोलिसांनी तात्काळ घटनास्थळी पोहोचून परिस्थिती नियंत्रणात आणली आणि परिसरात कडेकोट बंदोबस्त तैनात करण्यात आला.

दरम्यान, महाविद्यालय प्रशासनाने वेगळा दावा केला आहे. त्यांच्या म्हणण्यानुसार, विशाल बास्केटबॉलच्या रिंगला लटकून व्यायाम करत होता. त्यावेळी पोस्ट त्याच्या वजनाचा भार सहन करू शकली नाही आणि ही दुर्घटना घडली.

तळेगाव एमआयडीसी पोलीस ठाण्याचे उपनिरीक्षक प्रशांत रेळेकर यांनी सांगितले की, या प्रकरणी अपघाती मृत्यूची नोंद करण्यात आली असून अधिक तपास सुरू आहे. तसेच, या घटनेत कुणाची हलगर्जीपणा आढळल्यास कठोर कारवाई करण्यात येईल, असा इशारा पोलीस उपायुक्त श्वेता खेडकर यांनी दिला आहे.

या दुर्दैवी घटनेमुळे वर्मा कुटुंबावर दुःखाचा डोंगर कोसळला असून विद्यार्थ्यांमध्ये हळहळ व्यक्त केली जात आहे.