Pune : पुण्यात स्मशान काली मंदिर परिसरात थरार; तीन भावंडांना बेदम मारहाण, नेमकं काय घडलं?

Pune : पुणे शहरातील स्वारगेट परिसरात  तीन भावंडांवर जीवघेणा हल्ला झाल्याची धक्कादायक घटना उघडकीस आली आहे. या घटनेमुळे परिसरात खळबळ उडाली असून पोलिसांनी दोन आरोपींना अटक केली आहे.

पोलिसांनी दिलेल्या माहितीनुसार, फिर्यादी कानिफनाथ विष्णू नायडू (वय ५१, रा. काशेवाडी, भवानी पेठ) हे ३ एप्रिल रोजी सकाळी सुमारे ९.३० वाजता आपल्या दोन भावांसह काली मंदिर परिसरात आले होते. त्यावेळी आतिफ, अझीम सलीम शेख उर्फ ‘चोर’, गौरव गुजर, पियूष परदेशी, रेहान उर्फ ‘भैया’ आणि त्यांच्या इतर साथीदारांनी त्यांना अडवले.

जुन्या पैशांच्या व्यवहारावरून आरोपींनी फिर्यादीशी वाद घातला. वाद चिघळत जाऊन त्याचे रूपांतर हाणामारीत झाले. आरोपींनी संगनमताने फिर्यादीच्या डोक्यावर लोखंडी हत्याराने वार केला, तसेच पिस्तूल दाखवत जीवे मारण्याची धमकी दिली.

फिर्यादीला वाचवण्यासाठी पुढे आलेल्या त्यांच्या दोन्ही भावांनाही आरोपींनी बेदम मारहाण केली. लाथाबुक्क्यांसह हत्यारांचा वापर करून तिघांनाही गंभीर जखमी करण्यात आले. घटनेनंतर स्थानिकांच्या मदतीने जखमींना तातडीने रुग्णालयात दाखल करण्यात आले.

या प्रकरणी स्वारगेट पोलीस ठाण्यात गुन्हा दाखल करण्यात आला आहे. पोलिसांनी गौरव गुजर आणि रेहान उर्फ ‘खिम्या’ यांना अटक केली असून इतर आरोपींचा शोध सुरू आहे. प्राथमिक तपासात उसने दिलेले पैसे परत मागितल्याच्या वादातून ही घटना घडल्याचे समोर आले आहे.

या घटनेमुळे परिसरात भीतीचे वातावरण निर्माण झाले असून पोलिसांनी सुरक्षा वाढवली आहे.