MPSC Exam : कृषी सेवा परीक्षेतील उमेदवारांना तात्काळ नियुक्ती द्या, विजय वडेट्टीवार यांची विधानसभेत मागणी

MPSC Exam : महाराष्ट्र लोकसेवा आयोगामार्फत  कृषी सेवा परीक्षा घेण्यात आली होती. महाराष्ट्र कृषी सेवा परीक्षेमधून एकूण २०२ उमेदवारांची शिफारस महाराष्ट्र लोकसेवा आयोगमधून करण्यात आली आहे. परंतु अद्याप या उमेदवारांना नियुक्ती देण्यात आलेली नाही. त्यामुळे विद्यार्थी याप्रकरणी आक्रमक झाले आहेत. 

हे उमेदवारांना  मागील ७ महिन्यापासून नियुक्तीच्या प्रतिक्षेत आहेत. ते मागील दोन दिवसापासून आझाद मैदानात बेमुदत आंदोलनाला बसले आहेत, या उमेदवारांना नियुक्तीचे आदेश तात्काळ द्यावेत, अशी मागणी विधानसभेचे विरोधी पक्षनेते विजय वडेट्टीवार यांनी विधानसभेत केली आहे.

Manoj Jarange Patil : मला १०० टक्के अटक करणार आहेत...; मनोज जरांगेंचा खळबळजनक दावा

विजय वडेट्टीवार यांची मागणी

या उमेदवारांना मागील ७ महिन्यापासून नियुक्ती न दिल्याने ते दोन दिवसापासून आझाद मैदानात बेमुदत आंदोलनाला बसलेले आहेत. या नियुक्त्या रखडल्यामुळे अकोला तसेच अनेक जिल्ह्यात उपविभागीय कृषी अधिकारी पदांचा पदभार द्यायला, त्या दर्जाचे अधिकारी उपलब्ध नाहीत. त्यामुळे त्यांचा पदभार खालच्या दर्जाच्या अधिकाऱ्यांना देण्यात आला आहे.

त्यामुळे शासनाने यासंदर्भात तातडीने कार्यवाही करुन या २०२ उमेदवारांच्या नियुक्तीचे आदेश तात्काळ काढण्यात यावेत, अशी मागणी विरोधी पक्षनेते विजय वडेट्टीवार यांनी केली आहे. त्यांना सरकारकडून याबाबत सकारात्मक उत्तर देण्यात आलं आहे.

विद्यार्थ्यांचे बेमुदत आंदोलन

कृषी उपसंचालक (वर्ग १) १९, तालुका कृषी अधिकारी (वर्ग २)-६१, मंडळ कृषी अधिकारी (वर्ग २)-१२२ अशा एकूण २०२ उमेदवारांची शिफारस महाराष्ट्र लोकसेवा आयोगामधून करण्यात आली आहे. यासर्व उमेदवारांची कागदपत्रे दिनांक १७ व १८ ऑगस्ट, २०२३ रोजी तपासून पूर्ण झालेली आहे.

मागील ७ महिन्यापासून यांच्या नियुक्तीची प्रक्रिया कृषी विभागाकडून अजूनही पूर्ण झालेली नाही. यामुळे या उमेदवारांमध्ये निराशेचे वातावरण निर्माण झाले आहे. यामुळेच ते बेमुदत आंदोलन करत आहेत.