पुणे: पुणे महापालिकेच्या (PMC) बांधकाम आणि अतिक्रमण विरोधी विभागाच्या संयुक्त पथकाने बावधन बुद्रुक परिसरातील ५ अनधिकृत रेडी मिक्स काँक्रीट (RMC) प्लांटवर धडक कारवाई करत सुमारे ३५ हजार चौरस फुटांचे बेकायदा बांधकाम बुलडोझर आणि जेसीबीच्या साहाय्याने जमीनदोस्त केले. महावितरणच्या मदतीने या पाचही प्लांटचा वीजपुरवठा कायमस्वरूपी खंडित करण्यात आला. बावधनमधील या धडक कारवाईनंतर आता सिंहगड रस्त्यावरील धायरी आणि वडगाव बुद्रुक परिसरातील बेकायदा आरएमसी प्लांटवर महापालिका प्रशासन कधी हातोडा चालवणार, असा संतप्त आणि परखड सवाल स्थानिक नागरिकांकडून उपस्थित केला जात आहे.

बावधन परिसरातील निवासी भागात बेकायदा पद्धतीने सुरू असलेल्या आरएमसी प्रकल्पांमुळे हवेचे प्रचंड प्रदूषण, धुळीचे लोट, सिमेंटचा त्रास आणि अवजड वाहनांची अहोरात्र वाहतूक यांमुळे नागरिक हैराण झाले होते. आरोग्याच्या तक्रारी आणि वाढत्या त्रासामुळे नागरिकांनी आंदोलनाचा पवित्रा घेत सातत्याने महापालिकेकडे तक्रारी केल्या होत्या. त्याची दखल घेत महापालिकेने ९ जेसीबी, २ गॅस कटर, ६० महाराष्ट्र सुरक्षा दलाचे जवान आणि पोलिसांच्या कडक बंदोबस्तात बावधनमधील मार्क इन्फ्रा, अल्ट्राटेक आरएमसीसह ५ प्रकल्पांवर थेट कारवाई केली.

धायरी आणि वडगावमधील परिस्थिती अत्यंत बिकट:

बावधनमधील कारवाईने धायरी आणि वडगाव परिसरातील नागरिकांच्या आशेला नवे पल्लवी फुटले आहेत. धायरी, वडगाव, नऱ्हे आणि बेनकर वस्ती परिसरात गेल्या अनेक वर्षांपासून निवासी इमारतींच्या अगदी शेजारी अनेक बेकायदा आरएमसी प्लांट खुलेआम सुरू आहेत. या प्रकल्पांमधून उडणाऱ्या सिमेंटच्या धुळीमुळे वयोवृद्ध, लहान मुले आणि दम्याचे रुग्ण यांचे आरोग्य धोक्यात आले आहे. परिसरात घरांच्या खिडक्या, गाड्यांवर सिमेंट आणि धुळीचा जाड थर जमा होतो. अहोरात्र चालणाऱ्या मिक्सर ट्रकमुळे आवाजाचे प्रदूषण आणि रस्त्यांची दुरवस्था झाली आहे.

यापूर्वी धायरी व वडगावमधील ९ बेकायदा आरएमसी प्लांटवर छापा टाकण्याचे नियोजन महापालिकेने केले होते, मात्र प्रशासनातील गोपनीय माहिती लीक झाल्यामुळे व वरिष्ठ स्तरावरून अचानक आदेश आल्याने ती कारवाई स्थगित झाली होती, असा गंभीर आरोपही नागरिकांनी केला आहे. त्यामुळे बावधनप्रमाणेच धायरी आणि वडगाव भागातील बेकायदा प्लांटवरही कोणतीही हयगय न करता तात्काळ बुलडोझर चालवून नागरिकांना प्रदूषणाच्या त्रासातून मुक्त करावे, अशी आक्रमक मागणी आता जोर धरू लागली आहे.