सोलापूर: वाहतूक नियम अधिक कडक! HSRP नसलेल्या वाहनांवर RTO ची कारवाई; ट्रॅफिक पोलिसांसाठीही नवे निर्देश

सोलापूर:शहरातील वाढती वाहतूक कोंडी आणि अपघातांचे प्रमाण कमी करण्यासाठी पोलिस प्रशासनाने मोठे पाऊल उचलले आहे. वाहतूक शाखेच्या कार्यक्षमतेत वाढ करण्यासाठी पोलिस उपायुक्त (वाहतूक) वृष्टी जैन यांनी ट्रॅफिक पोलिसांना ड्युटीदरम्यान नेमून दिलेल्या ठिकाणीच उपस्थित राहणे बंधनकारक असल्याचे स्पष्ट आदेश दिले आहेत. याचबरोबर HSRP(High Security Registration Plate) नसलेल्या वाहनांवर प्रादेशिक परिवहन कार्यालयाकडून (RTO) कठोर कारवाई करण्यात येणार असून रिक्षाचालकांसाठी ड्रेसकोडही सक्तीचा करण्यात आला आहे.

१८ ब्लॅकस्पॉटवर विशेष लक्ष सोलापूर शहरात अपघातप्रवण म्हणून ओळखल्या जाणाऱ्या १८ ब्लॅकस्पॉटची ओळख पटविण्यात आली आहे. या ठिकाणी कोणत्या दिवशी आणि कोणत्या वेळेत अपघात अधिक होतात, त्यामागील कारणांचा सखोल अभ्यास सुरू आहे. या अभ्यासाच्या आधारे अपघात रोखण्यासाठी आवश्यक त्या उपाययोजना करण्यात येणार आहेत. यासाठी आयआयटी मद्रासच्या तज्ज्ञांच्या सहकार्याने वाहतूक पोलिसांना विशेष प्रशिक्षण देण्यात येत आहे, जेणेकरून अपघातांचे प्रमाण आणखी कमी करता येईल.

अपघातांमध्ये घट

मागील वर्षी जून महिन्यात नऊ गंभीर अपघातांमध्ये नऊ जणांचा मृत्यू झाला होता. मात्र यावर्षी जून महिन्यात गंभीर अपघात आणि अपघाती मृत्यूंच्या संख्येत चारने घट झाल्याची माहिती पोलिस उपायुक्त वृष्टी जैन यांनी दिली.यापुढे बेशिस्त वाहनचालकांवर अधिक प्रभावी कारवाई करण्यासाठी शहरात स्पीड डिटेक्शन कॅमेरे बसविण्याचा निर्णय घेण्यात आला असून त्यासाठी जिल्हा नियोजन समितीकडे निधीची मागणी करण्यात आली आहे.

वाहतूक नियमांबाबत जनजागृती

वाहनचालकांनी वाहतूक नियमांचे काटेकोर पालन करावे यासाठी पोलिस विभाग जनजागृती मोहीमही राबविणार आहे.पोलिस विभागातील सर्व कर्मचाऱ्यांसाठी हेल्मेट वापरणे बंधनकारक करण्यात आले असून, सर्वसामान्य दुचाकीस्वारांनीही स्वतःच्या सुरक्षिततेसाठी हेल्मेटचा वापर करावा, असे आवाहन करण्यात आले आहे.

HSRP नंबरप्लेट नसलेल्या वाहनांवर RTO ची कारवाई

वाहतूक नियमांची अंमलबजावणी अधिक प्रभावी करण्यासाठी HSRP (High Security Registration Plate) नसलेल्या वाहनांवर प्रादेशिक परिवहन कार्यालयाकडून कारवाई केली जाणार आहे.

वाहनमालकांनी नियमानुसार HSRP नंबरप्लेट बसवून घ्यावी, अन्यथा तपासणीदरम्यान दंडात्मक कारवाईला सामोरे जावे लागू शकते, असा इशारा प्रशासनाने दिला आहे.

रिक्षाचालकांसाठी ड्रेसकोड अनिवार्य

सोलापूर शहरात सार्वजनिक वाहतुकीसाठी मोठ्या प्रमाणावर रिक्षांचा वापर केला जातो. त्यामुळे प्रत्येक रिक्षाचालकाने निर्धारित गणवेश परिधान करणे बंधनकारक करण्यात आले आहे.

याशिवाय शहरातील काही रिक्षा स्टँडवर जागेची कमतरता असल्याने त्या ठिकाणी जागा वाढवून देण्यासाठी महापालिकेकडे प्रस्ताव पाठविण्यात आल्याची माहितीही पोलिस उपायुक्तांनी दिली.

प्रशासनाचा उद्देश

वाहतूक कोंडी कमी करणे, अपघातांचे प्रमाण घटविणे, वाहतूक व्यवस्थापन अधिक शिस्तबद्ध करणे आणि नागरिकांच्या सुरक्षिततेत वाढ करणे हा या उपाययोजनांचा मुख्य उद्देश असल्याचे पोलिस प्रशासनाने स्पष्ट केले आहे.