पुणे: "आमच्या लेकीला न्याय द्या!" पिंपळवंडीतील घटनेमुळे संतप्त नागरिकांचा पुणे-नाशिक महामार्गावर तब्बल २ तास रास्ता रोको

पुणे: पिंपळवंडी (ता. जुन्नर) येथील दहा वर्षीय अल्पवयीन मुलीवर लैंगिक अत्याचार करून तिची हत्या केल्याच्या घटनेने परिसरात संतापाची लाट उसळली आहे. या घटनेच्या निषेधार्थ बुधवारी (१९ ऑगस्ट) ग्रामस्थांनी पुणे-नाशिक राष्ट्रीय महामार्गावर सुमारे दीड ते दोन तास रास्ता रोको आंदोलन केले. पीडित मुलीला न्याय मिळावा, आरोपीला कठोरातील कठोर शिक्षा व्हावी आणि पीडित आदिवासी कुटुंबाचे पुनर्वसन करून शासनाकडून आवश्यक मदत मिळावी, या प्रमुख मागण्या आंदोलकांनी केल्या. या निषेधार्थ पिंपळवंडी गावही बंद ठेवण्यात आले होते. सकाळी दहाच्या सुमारास ग्रामस्थ महामार्गावर मोठ्या संख्येने जमले. 'आमच्या मुलीला न्याय द्या', 'आरोपीला कठोर शिक्षा द्या', अशा घोषणा देत आंदोलकांनी घटनेचा तीव्र निषेध केला. दोषींवर तातडीने कठोर कारवाई करण्याबरोबरच भविष्यात अशा घटना रोखण्यासाठी प्रशासनाने प्रभावी उपाययोजना कराव्यात, अशी मागणीही करण्यात आली.

आंदोलनात संगमनेर तालुका भाजपचे तालुकाध्यक्ष योगेश सूर्यवंशी, पुणे जिल्हा परिषदेचे सदस्य मंगेश काकडे, कृषी उत्पन्न बाजार समितीचे माजी सभापती रघुनाथ लेंडे, माजी पंचायत समिती सभापती संगीता वाघ, सरपंच मेघा काकडे, सुप्रिया लेंडे, मोनाली खोंड यांच्यासह मोठ्या संख्येने ग्रामस्थ सहभागी झाले. रास्ता रोकोमुळे पुणे-नाशिक राष्ट्रीय महामार्गावरील वाहतुकीवर परिणाम झाला. परिस्थिती नियंत्रणात ठेवण्यासाठी अप्पर पोलिस अधीक्षक गणेश बिरादार, उपविभागीय पोलिस अधिकारी धनंजय पाटील, स्थानिक गुन्हे अन्वेषण शाखेचे पोलिस निरीक्षक प्रमोद क्षिरसागर, आळेफाटा पोलिस ठाण्याचे पोलिस निरीक्षक विश्वास जाधव, सहाय्यक पोलिस निरीक्षक बळीराम घनटे यांच्यासह पोलिस अधिकारी व कर्मचारी घटनास्थळी उपस्थित होते.

आंदोलकांनी लेखी आश्वासन मिळेपर्यंत आंदोलन मागे न घेण्याची भूमिका घेतली. त्यानंतर महसूल विभागाच्या वतीने नायब तहसीलदार सचिन मुंढे यांनी ग्रामस्थ व पीडित कुटुंबीयांना शासनाकडून योग्य ती मदत आणि आवश्यक सहकार्य केले जाईल, असे आश्वासन दिले. त्यानंतर परिस्थिती निवळण्यास सुरुवात झाली. घटनेमुळे पिंपळवंडी तसेच परिसरात तीव्र संतापाचे वातावरण असून, पीडित कुटुंबाला न्याय आणि पुनर्वसन मिळावे, यासाठी प्रशासनाने तातडीने कार्यवाही करावी, अशी मागणी ग्रामस्थांकडून होत आहे.