आषाढी एकादशी २०२६: छत्रपती संभाजीनगर-पुणे महामार्गावर दोन दिवस वाहतुकीत मोठे बदल; 'हे' रस्ते राहणार बंद, जाणून घ्या पर्यायी मार्ग!

आषाढी एकादशी निमित्त प्रति पंढरपूर म्हणून प्रसिद्ध असलेल्या ठिकाणी दर्शनासाठी जाणाऱ्या भाविकांसाठी महत्त्वाची बातमी आहे. छत्रपती संभाजीनगरमध्ये आषाढी एकादशीनिमित्त २४ ते २५ जुलै २०२६ दरम्यान शहरात आणि महामार्गावर वाहतुकीत मोठे बदल करण्यात आले आहेत. भाविकांची गर्दी लक्षात घेता सुरक्षितता आणि सुरळीत वाहतुकीसाठी प्रशासनाने हा निर्णय घेतला आहे.

बंद असणारे प्रमुख मार्ग:

एएस क्लब चौक ते कामगार चौकपर्यंतचा रस्ता सर्व प्रकारच्या वाहनांसाठी बंद राहील.

तिरंगा चौक (ओयासिस) ते आंबेडकर चौक (एफडीसी कॉर्नर) हा रस्ता सर्व प्रकारच्या वाहनांसाठी बंद राहील.

पर्यायी मार्ग आणि वाहतूक व्यवस्था:

जालना, बीडकडून अहिल्यानगर, पुण्याकडे जाणारी जड व हलकी वाहने: महानुभव आश्रम चौक, कांचनवाडी, चित्तेगाव बिडकीन मार्गे इसारवाडी फाटा ते अहिल्यानगर आणि पुण्याकडे जातील व येतील.

 

धुळेकडून अहिल्यानगर, पुण्याकडे जाणारी जड वाहने: साजापूर फाटा, एएस क्लब पुलावरून कांचनवाडी पुलाखालून पैठण रस्त्यावरून चित्तेगाव, बिडकीन मार्गे इसारवाडी फाटा ते अहिल्यानगर, पुणे जातील व येतील.

पुणे-अहिल्यानगरकडून शहराकडे येणारी हलकी वाहने: पाटोदा, संताजी चौक, वाल्मी नाका, महानुभव चौक मार्गे पुढे जातील.

वाळूज एमआयडीसीकडून अहिल्यानगर, पुण्याकडे जाणारी जड वाहने: साजापूर फाटा, एएस क्लब पुलावरून कांचनवाडी पुलाखालून पैठण रस्त्यावरून चित्तेगाव, बिडकीन मार्गे इसारवाडी फाटा ते अहिल्यानगर, पुणे जातील.

छत्रपती संभाजीनगरकडून अहिल्यानगर, पुण्याकडे जाणारी एसटी बसेस व खासगी ट्रॅव्हल्स: महानुभव आश्रम चौक, कांचनवाडी, चित्तेगाव-बिडकीन मार्गे इसारवाडी फाटा येथून जातील.