पुणे: पिंपरी-चिंचवड पावसाने ठप्प हिंजवडी, वाकड, भोसरीसह अनेक भाग जलमय; अनेक रस्ते वाहतुकीसाठी बंद

पुणे: पिंपरी-चिंचवड शहरात सुरू असलेल्या मुसळधार पावसामुळे जनजीवन पूर्णपणे विस्कळीत झाले आहे. शहरातील अनेक प्रमुख रस्ते, पूल आणि अंडरपासमध्ये मोठ्या प्रमाणावर पाणी साचल्याने वाहतुकीवर गंभीर परिणाम झाला आहे. वाहतूक विभागाने दुपारी प्रसिद्ध केलेल्या अद्ययावत माहितीनुसार नागरिकांनी अत्यावश्यक कामाशिवाय घराबाहेर पडू नये, असे आवाहन करण्यात आले आहे.

हिंजवडी, वाकड, भोसरी, तळेगाव, देहू, आळंदी, चिखली, मोशी आणि इतर अनेक भागांमध्ये रस्त्यांवर पाणी साचल्याने वाहनांच्या लांबच लांब रांगा लागल्या आहेत. काही ठिकाणी वाहतूक संथ गतीने सुरू असून, तर काही मार्ग तात्पुरते बंद करण्यात आले आहेत. प्रशासनाने परिस्थितीनुसार पर्यायी मार्गांचा वापर करण्याचा सल्ला दिला आहे.

सततच्या पावसामुळे अनेक अंडरपास आणि सखल भाग पाण्याखाली गेले आहेत. काही ठिकाणी वाहने अडकली असून अग्निशमन दल, महापालिका आणि वाहतूक पोलिसांची पथके घटनास्थळी तैनात करण्यात आली आहेत. पाणी उपसण्याचे आणि वाहतूक सुरळीत करण्याचे काम युद्धपातळीवर सुरू आहे.

आळंदी आणि देहू परिसरातही नदीच्या पाणीपातळीत वाढ झाल्याने काही पूल आणि रस्त्यांवर वाहतुकीवर निर्बंध लावण्यात आले आहेत. तसेच तळेगाव आणि हिंजवडी परिसरातील आयटी कंपन्यांमध्ये काम करणाऱ्या कर्मचाऱ्यांना शक्य असल्यास घरातून काम (Work From Home) करण्याचा सल्ला काही कंपन्यांनी दिल्याची माहिती समोर आली आहे.

वाहतूक पोलिसांनी नागरिकांना पाण्याखाली गेलेल्या रस्त्यांवरून वाहन चालवू नये, प्रशासनाने दिलेल्या सूचनांचे पालन करावे आणि प्रवासापूर्वी वाहतुकीची सद्यस्थिती तपासूनच बाहेर पडावे, असे आवाहन केले आहे. हवामान विभागानेही पुढील काही तास मुसळधार पावसाची शक्यता कायम असल्याचे सांगितले असून नागरिकांनी विशेष सतर्कता बाळगण्याचा सल्ला दिला आहे.