अमरावती: बसच चोरीला... तेही थेट बसस्थानकातून! आरोपीची २० बसेस चोरल्याची कबुली; पोलिसही चक्रावले

अमरावती: अत्यंत धक्कादायक आणि पोलिसांनाही चक्रावून टाकणारी घटना समोर आली आहे. बसस्थानकातून थेट एसटी बस चोरी केल्याप्रकरणी अटक करण्यात आलेल्या आरोपीने चौकशीदरम्यान आतापर्यंत तब्बल २० बसेस चोरी केल्याची कबुली दिली आहे. या खुलाशामुळे पोलिस यंत्रणाही आश्चर्यचकित झाली असून, या संपूर्ण रॅकेटचा सखोल तपास सुरू करण्यात आला आहे.

पोलिसांच्या माहितीनुसार, आरोपी अत्यंत चलाखीने बसस्थानकांमधून किंवा इतर ठिकाणी उभ्या असलेल्या बसेसवर लक्ष ठेवत असे. योग्य संधी साधून तो बस घेऊन पसार होत असे. या प्रकरणात अटक झाल्यानंतर चौकशीदरम्यान त्याने अनेक धक्कादायक खुलासे केले असून, विविध भागांतून एकूण २० बसेस चोरी केल्याची कबुली दिली आहे.

या कबुलीजबाबानंतर पोलिसांनी आरोपीने सांगितलेल्या सर्व चोरीच्या घटनांची पडताळणी सुरू केली आहे. संबंधित जिल्ह्यांतील पोलिस ठाण्यांशी संपर्क साधून पूर्वी दाखल झालेल्या बस चोरीच्या गुन्ह्यांची माहिती मागविण्यात आली आहे. तसेच चोरीच्या बस कुठे विकल्या गेल्या किंवा त्यांचा अन्य कोणत्या कारणासाठी वापर करण्यात आला का, याचाही तपास सुरू आहे.

या घटनेमुळे सार्वजनिक वाहतूक व्यवस्थेच्या सुरक्षेबाबत प्रश्नचिन्ह निर्माण झाले आहे. बसस्थानकांवर उभ्या असलेल्या वाहनांच्या सुरक्षेसाठी अधिक कडक उपाययोजना करण्याची गरज व्यक्त केली जात आहे.
दरम्यान, आरोपीकडून आणखी महत्त्वाची माहिती मिळण्याची शक्यता असून, या प्रकरणात इतर कोणाचा सहभाग आहे का, याचाही तपास पोलिस करत आहेत.