मुंबई: गुजरातमध्ये एमडी ड्रग्ज बनवणाऱ्या कारखान्याचा पर्दाफाश; साकीनाका पोलिसांची धडाकेबाज कारवाई

मुंबई: साकीनाका पोलिसांनी एका आंतरराज्यीय ड्रग्ज रॅकेटचा पर्दाफाश करत गुजरातमधील नर्मदा जिल्ह्यात सुरू असलेला मेफेड्रॉन (MD) ड्रग्ज बनवण्याचा कारखाना उद्ध्वस्त केला आहे. या कारवाईत पोलिसांनी सुमारे ७४ कोटी रुपये किमतीचे ड्रग्ज, रसायने आणि यंत्रसामग्री जप्त केली आहे.

नेमकं काय घडलं?
साकीनाका पोलिसांच्या अंमली पदार्थ विरोधी पथकाने २१ मे रोजी अंधेरी-घाटकोपर लिंक रोडवर मुस्कान समीर खान (२६) या महिला कॅब चालकाला १०१ ग्रॅम एमडी ड्रग्जसह अटक केली होती. तिच्या चौकशीतून हे ड्रग्ज मुंब्रा येथील वझुल कमर अब्दुल वफा चौधरी (५६) याच्याकडून घेतल्याचे निष्पन्न झाले. पोलिसांनी वझुल चौधरीला शिळफाटा येथून ताब्यात घेतले. चौकशीदरम्यान, चौधरीने गुजरातच्या नर्मदा जिल्ह्यातील वरखड गावात (ता. नांदोद) एका व्यक्तीचे घर भाड्याने घेऊन तिथे एमडी ड्रग्ज निर्मितीचे युनिट सुरू केल्याची धक्कादायक माहिती दिली.

पोलिसांची मोठी कारवाई
मिळालेल्या माहितीच्या आधारे साकीनाका पोलिसांच्या पथकाने गुजरातमध्ये धाड टाकली. तेथे भाड्याच्या घरात सुरू असलेला एमडी ड्रग्ज निर्मितीचा कारखाना पोलिसांनी उद्ध्वस्त केला. या छाप्यात पोलिसांनी २० किलो लिक्विड मेफेड्रॉन, एमडी बनवण्यासाठी लागणारी विविध रसायने (ब्रोमो-४-मिथिलॅनिलिन, ४-मिथिलप्रोपियोफेनोन इ.), तीन स्टिरर मशिन्स, दोन कमर्शियल फ्रीझर्स आणि अन्य साहित्य असा सुमारे ७४.४६ कोटी रुपयांचा मुद्देमाल जप्त केला आहे.

आरोपींची गुन्हेगारी पार्श्वभूमी
मुख्य आरोपी वझुल चौधरी हा सराईत गुन्हेगार असून, तो २००१ पासून अंमली पदार्थांच्या अवैध धंद्यात सक्रिय आहे. यापूर्वी त्याला २००१ मध्ये चरस तस्करी प्रकरणात आणि २०१७ मध्ये २३८ किलो एमडी प्रकरणात अटक झाली होती. २०२३ मध्ये तुरुंगातून बाहेर आल्यानंतर त्याने पुन्हा एकदा ड्रग्ज निर्मिती आणि वितरणाचे जाळे विणले होते. मुस्कान खान ही देखील या रॅकेटमध्ये सक्रिय असून, ती कॅब चालवण्याच्या बहाण्याने ड्रग्जची विक्री करत होती. सध्या पोलीस या रॅकेटमधील इतर साथीदारांचा आणि त्यांच्या वितरण साखळीचा सखोल तपास करत आहेत.