अहिल्यानगर: पदोन्नतीचा आनंद मावळला! लाच मागणाऱ्या पोलीस उपनिरीक्षकावर कार्यमुक्तीच्या दिवशीच गुन्हा दाखल.

अहिल्यानगर: जिल्हा पोलीस दलात एक धक्कादायक घटना समोर आली आहे. नगर तालुका पोलीस ठाण्याचा पोलीस उपनिरीक्षक (PSI) गांगुर्डे हा लाचलुचपत प्रतिबंधक विभागाच्या (ACB) जाळ्यात अडकला आहे. एका गुन्ह्यात आरोपीला मदत करण्यासाठी तडजोडीअंती तब्बल १ लाख रुपयांची लाच स्वीकारण्यास संमती दर्शविल्याप्रकरणी गांगुर्डेच्याविरोधात तोफखाना पोलीस ठाण्यात गुन्हा दाखल करण्यात आला आहे. विशेष म्हणजे, पदोन्नती मिळाल्यानंतर कार्यमुक्त होण्याच्या दिवशीच ही कारवाई झाल्याने पोलीस वर्तुळात मोठी खळबळ उडाली आहे.

मिळालेल्या माहितीनुसार, नगर तालुका पोलीस ठाण्यात १५ जणांवर एक गुन्हा दाखल आहे. या गुन्ह्यातील आरोपीला मदत करण्यासाठी आणि कायदेशीर प्रक्रियेत सवलत देण्यासाठी गांगुर्डे याने १ लाख रुपयांच्या लाचेची मागणी केली होती. या संदर्भात तक्रारदाराने एसीबीकडे तक्रार केली होती. एसीबीच्या पथकाने शहानिशा केली असता, गांगुर्डे याने लाच स्वीकारण्यास संमती दर्शविल्याचे निष्पन्न झाले.

पोलीस उपनिरीक्षक गांगुर्डे याला काही दिवसांपूर्वीच सहाय्यक पोलीस निरीक्षक (API) पदी पदोन्नती मिळाली होती. पदोन्नतीनंतर पोलीस मुख्यालयात सुरू असलेल्या प्रशिक्षणासाठी त्याची निवड झाली होती. तांत्रिक कारणांमुळे तो अद्याप कार्यमुक्त झाला नव्हता. मात्र, ज्या दिवशी गांगुर्डे याला प्रशिक्षणासाठी कार्यमुक्त केले जाणार होते, त्याच दिवशी हा लाचखोरीचा प्रकार उघडकीस आला. लाचलुचपत प्रतिबंधक विभागाने या प्रकरणी तोफखाना पोलीस ठाण्यात गांगुर्डेविरुद्ध लाचलुचपत प्रतिबंधक कायद्यानुसार गुन्हा दाखल केला असून, पुढील तपास सुरू आहे.