सांगलीकरांनो काळजी घ्या! पुढील ५ दिवस ताशी ५० किमी वेगाने वादळी वारे अन् मुसळधार पावसाचा इशारा!

सांगली: सांगली जिल्हा आणि परिसरात राहणाऱ्या नागरिकांसाठी हवामान विभागाकडून एक अत्यंत महत्त्वाची माहिती समोर आली आहे. सांगली जिल्ह्यात पुढील पाच दिवस मुसळधार मान्सूनपूर्व वादळी पावसाची (Pre-Monsoon Rain) शक्यता वर्तवण्यात आली आहे. या काळात ताशी ५० किलोमीटर वेगाने वादळी वारे वाहण्याची आणि विजांच्या कडकडाटासह जोरदार पाऊस कोसळण्याची शक्यता आहे. त्यामुळे सांगलीकरांना घराबाहेर पडताना विशेष काळजी घेण्याचे आवाहन करण्यात आले आहे.

शेतकऱ्यांना सतर्कतेचा इशारा हवामान विभागाच्या (IMD) या अंदाजामुळे कृषी विभागाने जिल्ह्यातील शेतकऱ्यांना सतर्क राहण्याचा सल्ला दिला आहे. सध्या शेतात सुरू असलेली महत्त्वाची कामे, पिकांची काढणी आणि कृषी औषध फवारणीचे नियोजन अतिशय काळजीपूर्वक करावे, असे आवाहन करण्यात आले आहे. अवकाळी आणि मान्सूनपूर्व पावसामुळे काढणीला आलेल्या पिकांचे नुकसान होऊ नये, यासाठी शेतकऱ्यांनी योग्य ती पूर्वदक्षता घेणे गरजेचे आहे.

पुढील पाच दिवस हवामानातील हा बदल प्रामुख्याने पाहायला मिळणार असून, दुपारनंतर किंवा संध्याकाळच्या वेळी वादळी वाऱ्यासह मुसळधार पाऊस सक्रिय होऊ शकतो. नागरिकांनी विजा चमकत असताना झाडांखाली किंवा मोकळ्या जागेत थांबणे टाळावे, असे प्रशासनातर्फे सांगण्यात आले आहे.