अग्निशामक अधिकाऱ्यासह दोघांचा दुर्दैवी मृत्यू! ठाणे स्टेशन परिसर हादरला! गावदेवी भाजी मार्केट इमारतीत पहाटेचा थरार;

ठाणे: ठाणे रेल्वे स्थानक परिसरातील अत्यंत गजबजलेल्या नौपाडा (Naupada) भागातून एक अत्यंत धक्कादायक आणि हृदयद्रावक घटना समोर आली आहे. गोखले रोडवर असलेल्या प्रसिद्ध गावदेवी भाजी मार्केट (Gaondevi Vegetable Market) इमारतीला आज पहाटे भीषण आग लागली. या अग्नितांडवात भाजी मार्केट आणि कपड्यांच्या दुकानांचे तब्बल १५० गाळे जळून खाक झाले आहेत. अत्यंत दुर्दैवी बाब म्हणजे, या दुर्घटनेत कर्तव्य बजावताना ठाणे महानगरपालिकेच्या एका धाडसी अग्निशामक अधिकाऱ्यासह एका सुरक्षारक्षकाचा होरपळून व श्वास गुदमरून मृत्यू झाला आहे, तर इतर दोन कर्मचारी गंभीर जखमी झाले आहेत. पहाटेच्या सुमारास आगीचे तांडवमिळालेल्या माहितीनुसार, गुरुवारी पहाटे ३:४३ वाजण्याच्या सुमारास गावदेवी प्रभाग समिती कार्यालयाजवळील मार्केट इमारतीमधून अचानक आगीच्या ज्वाला निघताना दिसल्या.

स्थानिक नगरसेवकांनी तातडीने याची माहिती ठाणे महानगरपालिकेच्या आपत्ती व्यवस्थापन कक्षाला (RDMC) दिली. लाकडी फळ्या, प्लास्टिक शीट्स आणि कपड्यांच्या साठ्यामुळे आग काही मिनिटांतच संपूर्ण मार्केटमध्ये पसरली आणि भीषण स्वरूप धारण केले.वाचवताना स्वतःचाच गेला जीव; दोघांचा मृत्यूया आगीच्या घटनेत बचावकार्य करत असताना मोठी शोकांतिका घडली. इमारतीमध्ये ठाणे महानगरपालिकेचे आरक्षक (सुरक्षारक्षक) काळू शंकर गाडेकर (वय ५३) हे अडकले होते. त्यांना वाचवण्यासाठी आणि आग विझवण्यासाठी अग्निशमन केंद्राचे स्थानक अधिकारी सागर शिंदे (वय ४३) यांनी जीवाची परवा न करता धुराच्या लोटात प्रवेश केला. मात्र, इमारतीमध्ये विषारी वायू आणि धूर प्रचंड प्रमाणात पसरल्यामुळे या दोघांचाही गुदमरून आणि होरपळून अत्यंत दुर्दैवी अंत झाला. याशिवाय, आग विझवताना अग्निशमन विभागातील स्थानक अधिकारी सुजित पष्टे (वय ४५) आणि तांडेल समीर जाधव (वय ४०) हे गंभीर जखमी झाले असून, त्यांना उपचारासाठी कळवा येथील छत्रपती शिवाजी महाराज रुग्णालयात दाखल करण्यात आले आहे.

मोठी यंत्रणा घटनास्थळी; व्यापाऱ्यांचे नुकसानआगीची भीषणता
पाहता अग्निशामक दलाच्या ५ गाड्या, ३ जम्बो वॉटर टँकर, २ नेहमीचे वॉटर टँकर, ४ रेस्क्यू वाहने आणि ठाणे आपत्ती प्रतिसाद दल (TDRF) तातडीने घटनास्थळी दाखल झाले. नौपाडा पोलीस आणि महावितरणच्या कर्मचाऱ्यांनी संपूर्ण परिसराची नाकेबंदी करून वीजपुरवठा खंडित केला. तब्बल ४ ते ५ तासांच्या शर्थीच्या प्रयत्नांनंतर आगीवर पूर्णपणे नियंत्रण मिळवण्यात आले.या आगीमुळे १५० हून अधिक व्यापाऱ्यांचे कोट्यवधी रुपयांचे आर्थिक नुकसान झाले असून परिसरात मोठी हळहळ व्यक्त केली जात आहे. आगीचे नेमके कारण अद्याप स्पष्ट झालेले नसले, तरी शॉर्ट सर्किटमुळे ही आग लागल्याचा प्राथमिक अंदाज वर्तवला जात आहे. पोलीस आणि अग्निशमन विभाग या प्रकरणाचा सखोल तपास करत आहेत.