मनमाड-मालेगाव रस्त्यावर मृत्यूचा थरार! टँकर आणि ट्रकची समोरासमोर धडक; ४ जण गंभीर जखमी!

इंदूर-पुणे महामार्गावरील मालेगाव-मनमाड-येवला मार्गावर अपघातांचे सत्र थांबण्याचे नाव घेत नाहीये. मंगळवारी (दि. ५ मे २०२६) दहेगाव शिवारात टँकर (क्र. एमएच ४१ एजी ८०४३) आणि युरिया वाहून नेणाऱ्या ट्रकची समोरासमोर जोरदार धडक झाली. हा अपघात इतका भीषण होता की, दोन्ही वाहनांच्या दर्शनी भागाचा अक्षरशः चक्काचूर झाला.

अपघाताची भीषणता पाहून स्थानिक नागरिकांनी तातडीने मदतीसाठी धाव घेतली. अपघातग्रस्त वाहनांमध्ये अडकलेल्या जखमींना बाहेर काढण्यासाठी गाडीचे पत्रे कापण्याची वेळ आली होती. या अपघातात चार जण गंभीर जखमी झाले असून, त्यांना तातडीने मनमाड येथील उपजिल्हा रुग्णालयात दाखल करण्यात आले आहे. महामार्गावरील अवजड वाहनांची वर्दळ आणि चालकाचा अतिवेग यामुळे हा अपघात झाल्याचा प्राथमिक अंदाज आहे. या घटनेमुळे महामार्गावरील सुरक्षिततेचा प्रश्न पुन्हा एकदा ऐरणीवर आला आहे.